Россия Украинадаги урушда эркак аҳолисининг 1 фоизидан ажралди — The Economist
The Economist ҳисобларига кўра, Россиянинг Украинадаги урушда ҳалок бўлган ҳарбийлари сони мамлакат эркак аҳолисининг 1 фоизидан ошиши мумкин.
The Economist таҳлилига кўра, Украинага қарши босқинчи урушда Россия ҳалок бўлган ҳарбийлар сони бўйича тарихий йўқотишларга дуч келмоқда. Нашр 2020–2021 йиллардаги сўнгги аҳоли рўйхатга олиш маълумотларига таяниб, Россияда 68 млн дан ортиқ эркак яшаганини эслатади. Шундан келиб чиқиб, фронтда ўлган россияликлар сони 680 минг кишидан ошган бўлиши мумкин. Агар фақат меҳнатга лаёқатли ёшдагиларни ҳисобга олса, йўқотишлар тахминан 430 минг нафарга тенг бўлиши айтилмоқда.
Маълумот учун, бундан аввал Ғарб разведкалари Россиянинг умумий ҳалок бўлганлари сонини 115 мингдан 200 минг нафаргача баҳолаган эди. The Economist эса умумий йўқотишлар — ўлган ва оғир яраланганлар сони 1 млн дан 1,35 млн нафаргача етиб, бу кўрсаткич АҚШнинг Иккинчи жаҳон урушидаги ҳарбий йўқотишларидан ҳам юқори эканини таъкидлайди.
Уруш майдонида Россиянинг ҳудудий ютуқлари қийин аҳволда экани ҳам кўрсатилган. ISW маълумотларига кўра, 2025 йил давомида Россия 4562 км² майдонни эгаллади — бу ўтган йилги кўрсаткичдан 22 фоизга кўп. Бироқ умумий суръат жуда секин: уч йилда Россия фақат 1,45 фоизгина Украина ҳудудини қўшимча оккупация қила олди.
Уруш бошланганидан буён Россия бирор йирик украин шаҳарини тўлиқ эгаллай олмади. Бир ярим йил давомида давом этаётган Покровск учун жанглар шундай мисол бўлиб, ушбу шаҳар урушдан аввал ҳам Украинадаги катталиги бўйича 73-шаҳар бўлган.
The Economist ҳисобича, Россия Конституциясига киритилган Херсон, Запорижжя, Донецк ва Луҳанск областларининг қолган қисмини босиб олиши учун камида яна икки ярим йил, яъни 2028 йил майигача жанг қилиш керак бўлади.
НАТО маълумотларига кўра, 2025 йил ноябрида Россия ҳар куни Украинада ўртача 1100 ҳарбий йўқотган — бу октябр ойидаги кўрсаткичдан ҳам юқори. Умумий ўлган ва яраланганлар сони эса 1,15 млн нафарга яқинлашгани айтилган.
