Россияда янги 1000 рубллик банкнота муомалага чиқарилди

Россия Марказий банки расман 1000 рубллик модернизация қилинган банкнотани муомалага чиқарганини маълум қилди. Янги купюра Волгабўйи федерал округи ва унинг маданий меросини акс эттиради.

Банкнотнинг олд томонида Нижний Новгород кремлининг Николская минораси тасвирланган. Бу иншоот шаҳарнинг асосий рамзларидан бири ҳисобланади ва унинг тарихий аҳамияти алоҳида таъкидланган.

Орқа томонида эса бир неча объект жой олган: Саратов автомобил кўприги, «Метеор-120Р» сув ости қанотли кемаси ҳамда Қозон шаҳридаги Деҳқончилик саройи. Бу тасвирлар ҳудуднинг транспорт, технология ва маданий ривожини ифодалайди.

Янги банкнота ферузаранг гаммасида ишланган бўлиб, замонавий дизайн ва кучайтирилган ҳимоя элементларига эга. Марказий банк маълумотларига кўра, купюрада қалбакилаштиришга қарши янги авлод муҳофаза тизими қўлланган.

Банкнотада QR-код ҳам мавжуд. У орқали фуқаролар Марказий банк сайтида купюранинг бадиий ечими ва ҳақиқийлигини текшириш белгилари билан танишиши мумкин.

Аввалроқ 1000 рубллик банкнотанинг илгариги дизайни жамоатчилик баҳсларига сабаб бўлган эди. Унда Қозон Кремлидаги ибодатхона қуббаси тасвирида хоч йўқлиги рус ултрамиллатчиларининг қатъий эътирозларга сабаб бўлган эди. Бу эътирозлар фонида Марказий банк ҳам чекиниб, дизайн қайта кўриб чиқилишини, жамиятни бирлаштирадиган рамзлар ишлаб чиқилишини айтган.