Россиянинг денгиз орқали нефт экспорти 20 фоизга қисқарди — Bloomberg

АҚШнинг янги санкциялари Россия нефт бозорига жиддий зарба берди. 2 ноябрда якунланган ҳафтада Россия портларидан чиқиб кетган нефт ҳажми 21,1 млн баррелни ташкил этди, бу эса ўтган ҳафтадаги 26,4 млн баррелдан 20 фоизга кам. Кўрсаткич суткалик ҳисобда 3,77 млн баррелдан 3,02 млн баррелгача тушган. Бу ҳақда Bloomberg маълум қилди.

Таҳлилчиларнинг айтишича, нефт ташувчи 26 та танкер ҳозирда маҳсулотни қайта ишлаш заводларига етказмасдан, денгизда «сузиб юрувчи омбор» сифатида туриб қолган. Сентябрдан бери танкерлардаги нефт ҳажми 8 фоизга кўпайиб, 380 млн баррелдан ошиб кетган — бу Россиянинг 100 кунлик экспортига тенг миқдордир.

Ҳиндистон, Хитой ва Туркия — Россия нефтнинг 95 фоизини сотиб олувчи асосий бозорлар ҳисобланади. Аммо сўнгги чекловлардан кейин уларнинг аксарияти етказиб беришни вақтинча тўхтатди ёки санкцияларга кирмаган кичик компаниялардан сотиб олишга ўтди. Ҳиндистоннинг энг йирик хусусий концерни Reliance Industries АҚШ санкцияларига амал қилиши, Indian Oil эса декабр ойига мўлжалланган 3,5 млн барреллик нефт партиясини санкцияга кирмаган компаниялардан сотиб олганини маълум қилди.

Хитойнинг Sinopec ва PetroChina компаниялари ҳам айрим Россия партияларини бекор қилган. Rystad Energy баҳосича, Хитойнинг нефт импорти 45 фоизга — яъни кунига тахминан 400 минг баррелгача камайиши мумкин.

Gunvor компанияси бош директори Торбион Торнквист фикрича, Россия вақтинча қийинчиликка дуч келса ҳам, экспортни қисман тиклай олади. Унинг таъкидлашича, бозордаги таъсир чекланган бўлиб, нефть нархи фақат бир неча долларга кўтарилган — Brent қиймати ҳозирда 64–66 доллар атрофида.