Россиянинг Киевга зарбаси оқибатида Американинг дрон ишлаб чиқарувчи заводи вайрон бўлди
Бу Москванинг ушбу можарода АҚШ мудофаа компаниясини илк бор нишонга олиши бўлиши мумкин.
Бугун, 31 июл куни Россиянинг Киевга берган ракета зарбаси оқибатида Американинг «Terminal Autonomy» корпорациясига тегишли дрон заводи вайрон бўлди. Бу ҳақда компанияга яқин манбага таяниб, «The Guardian» нашри хабар бермоқда.
Бу Москва томонидан ушбу можаро давомида АҚШ мудофаа компаниясининг биринчи марта нишонга олиниши бўлиши мумкин, деб тахмин қилинмоқда. Зарба оқибатида ҳеч ким ҳалок бўлмаган, дейилади хабарда. «Terminal Autonomy» ва Украина Мудофаа вазирлиги нашрнинг изоҳ сўраб ёзган электрон мурожаатларига жавоб бермаган.
«Терминал автономлик» ва ишлаб чиқариш қуввати
2023 йилда АҚШнинг Делавэр штатида рўйхатдан ўтган «Terminal Autonomy» компанияси Россиянинг радиоэлектрон кураш сигналларига чидамли бўлган, йўналтирувчи тизимларга эга узоқ масофага учувчи, юқори аниқликдаги дронларни ишлаб чиқаради. Заводда «AQ-400 Scythe» ва «AQ-100 Bayonet» моделлари ишлаб чиқарилган. Нашрнинг тушунтиришича, «терминал автономлик» атамаси камикадзе-дрон ҳужумининг сўнгги босқичини англатади, бунда ҳимояланувчи томон радиотўлқинлар ёки алоқани тўсиб қўйганда, қуролни бошқаришни сунъий интеллект ўз зиммасига олади.
Россиянинг ТАСС давлат ахборот агентлиги якшанба куни ушбу ҳужум ҳақида биринчи бўлиб хабар берган ва Россия Мудофаа вазирлиги маълумотларига таянган. Баёнотда Киевнинг жануби-ғарбий қисмида жойлашган, ойига мингтагача дрон ишлаб чиқарадиган йиғиш ва сақлаш жойига зарба берилгани айтилади.
ТАСС хабарида завод Америка компаниясига тегишли эканлиги очиқланмаган, бироқ у ерда «Украина-Америка компанияси мутахассислари» ишлагани ва корхонада «AQ-400 Scythe» ва «AQ-100 Bayonet» дронлари ишлаб чиқарилгани қайд этилган.
«Россияликларга ишлаб чиқариш объекти кимга тегишли эканлигининг фарқи йўқ. У барибир нишон ҳисобланади. Улар учун бу Американикими ёки бошқасиникими, аҳамиятсиз», — деди АҚШ разведкасининг собиқ катта зобити Энтони Винчи.
Июл ойи бошида Доналд Трамп АҚШ Украинага «Patriot» зенит ракеталарини ишлаб чиқариш учун лицензия бериши мумкинлигини айтган эди.
Бунга изоҳ берар экан, Винчи шундай деди: «Агар Украинада «Patriot» ракеталари ёки ҳар қандай Америка тизими ишлаб чиқарилгудек бўлса, менимча, руслар ўша ишлаб чиқариш объектини ҳам нишонга олади».
