Рус миллатчилари 2050 йилгача бўлган уруш ва ривожланишнинг учта сценарийсини тақдим этди
Уларда Украинанинг босиб олиниши, Россиянинг мағлубияти, Европа Иттифоқининг парчаланиши ва ҳатто ядро қуролидан фойдаланиш эҳтимоли ҳам кўриб чиқилган.
Санкт-Петербург халқаро иқтисодий форумида россиялик ўта миллатчилар томонидан Россия учун 2036 ва 2050 йилларга мўлжалланган ривожланишнинг учта сценарийси тақдим этилди. Ушбу прогнозларда Украинанинг йирик шаҳарларини босиб олиш, Европа Иттифоқининг парчаланишидан тортиб, Москванинг мағлубияти, Украинанинг НАТОга кириши ва ядро қуролини қўллашгача бўлган келажак вариантлари кўриб чиқилган. Бу ҳақда Урушни ўрганиш институти (ISW) хабар берди.
Россиянинг «Коммерсант» газетаси хабарига кўра, тақдимот муаллифлари Кремл билан алоқадор олигарх Константин Малофеев ва мафкурачи Александр Дугин ҳисобланади.
Узоқ давом этадиган уруш тарафдори бўлган кескин йўналиш вакилларидан иборат ушбу муаллифлар Россия учун барча эҳтимолий таҳдидларни бешта тоифага: геосиёсат, мафкура, демография, иқтисодиёт ва технологияларга ажратган.
Шунингдек, Александр Дугиннинг маълум қилишича, «Царград институти» таҳлил маркази ушбу ҳисобот билан Россия Қуролли кучлари Бош штаби академиясини аллақачон таништирган ва ҳужжат 2026 йил охиригача оммага эълон қилинади.
Воқеалар ривожининг уч хил варианти
Форум иштирокчиларига воқеалар ривожининг яхши, ёмон ва инерцион вариантлари таклиф қилинди. Сценарийлар қуйидагиларни ўз ичига олади:
«Яхши» сценарий: Россия томонидан Киев, Одесса, Харкив ва Украинанинг бошқа шаҳарлари тўлиқ босиб олинади. Шунингдек, 2036 йилга бориб Европа Иттифоқи барҳам топади.
«Ёмон» сценарий: Россия урушда мағлубиятга учрайди, Украина НАТОга интеграциялашади ва 2036 йилгача постсовет ҳудудида Россия таъсири тўлиқ йўқолади. 2050 йилга бориб эса Россия мустамлакага айланади.
«Инерцион» (доимий) сценарий: Агар фронтдаги вазият ўзгаришсиз қолса, Россия 2036 йилга келиб Украинага қарши ядро қуролини қўллашга мажбур бўлади.
Институт экспертларининг таъкидлашича, бундай радикал режалар Кремлнинг расмий позициясидан бироз фарқ қилади, аммо ҳукумат улардан ўзининг «мўтадиллигини» намойиш қилиш учун фойдаланиши мумкин.
Таҳлилчиларнинг қайд этишича, бундай прогнозларнинг эълон қилиниши Россия ҳукумати учун манфаатли бўлиб, мамлакат раҳбариятининг расмий баёнотларини қабул қилиш жараёнида жамоатчилик фикрини манипуляция қилишга ёрдам беради.
Кремл ушбу учта сценарийнинг реалликдан йироқ эканидан фойдаланиб, Россия президенти Владимир Путин ва бошқа амалдорларнинг риторикасини кичик бир ўта миллатчилар гуруҳи томонидан тақдим этилган экстремал сценарийларга қараганда мўтадил ва оқилона қилиб кўрсатиши мумкин.
Шу билан бирга, экспертларнинг қўшимча қилишича, Россия раҳбарияти барибир радикал гуруҳларнинг талаблари, ўзининг тарғиботи ва Украинадаги жанг майдонида содир бўлаётган реал воқеалар ўртасида мувозанатни сақлашга мажбур бўлади. Чунки Владимир Путин радикал кайфиятдаги қатламнинг содиқлигини сақлаб қолишга интилмоқда.
