Самарқандда ноқонуний олтин сотганлар фош этилди
Айбланувчилар қонунга хилоф равишда жами оғирлиги 475 грамни ташкил қилган 2 бўлак олтин қуймаларни харидорга 737 млн сўмга сотишга келишиб, олдиндан 500 млн сўм олган вақтда ашёвий далиллар билан қўлга олинган.
Самарқанд вилоятида ноқонуний олтин савдоси тўхтатиб қолинди. Бу ҳақда ДХХ ахборот хизмати хабар берди.
Маълумотларга кўра, Давлат хавфсизлик хизматининг Қашқадарё вилояти бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида Самарқанд вилоятининг Каттақўрғон туманида тезкор тадбир ўтказилган.
Аниқланишича, Навоий ва Самарқанд вилоятларида яшовчи, 1982, 1984 ва 1996 йилларда туғилган 3 нафар фуқаро қонунга хилоф равишда жами оғирлиги 475 грамни ташкил қилган 2 бўлак олтин қуймаларни харидорга 737 млн сўмга сотишга келишган ва олдиндан 500 млн сўм олган вақтларида ашёвий далиллар билан ушланган.
Қайд этилишича, мазкур шахсларнинг 2 нафари муқаддам судланган бўлиб, улардан бири ҳозирда ахлоқ тузатиш ишлари жазосини ўтаётган бўлган.
Давлат асиллик даражаси назорати инспекциясининг тегишли хулосасига кўра, 994 асиллик даражасидаги ушбу олтин қуймаларнинг соф оғирлиги 472 грамм бўлиб, умумий қиймати 740,4 млн сўмни ташкил этган.
Ҳозирда мазкур шахсларга нисбатан Жиноят Кодексининг 177-моддаси (валюта қимматликларини қонунга хилоф равишда олиш ёки ўтказиш) 4-қисми «а» банди билан жиноят иши қўзғатилиб, тергов ҳаракатлари олиб борилмоқда.
