Санкциялар Америка бизнесига ҳам қаттиқ зарба берди
AmCham президентига кўра, Россияга қарши санкциялардан АҚШ ишбилармон доиралари $100 млрд зарар кўрган.
Ғарбнинг Россияга нисбатан киритган санкцияларидан АҚШ ишбилармон доиралари тахминан 100 миллиард доллар миқдорида зарар кўрган. Бу ҳақда Россия Федерациясидаги Америка Савдо Палатаси (AmCham) президенти Роберт Эйджи RTVI телеканалига берган интервюсида маълум қилди.
Унинг сўзларига кўра, компаниялар учун қўлдан бой берилган потентсиал имкониятларни ҳисобга олган ҳолда, умумий йўқотишлар $300 миллиардга яқинлашади.
Роберт Эйджининг таъкидлашича, АҚШ тадбиркорларига Россия қўллаган қарши чоралар эмас, балки Вашингтоннинг ўз санкциялари жиддийроқ молиявий зиён етказган. У ушбу зарбанинг кучини ўн балли шкала бўйича 8 балл деб баҳолади. Россиянинг жавоб чекловлари эса, унинг фикрича, атиги 5 балл билан баҳоланади.
AmCham президенти шунингдек, Россия иқтисодий тизими жорий чекловларга мослаша олганини, аммо Америка бизнеси ҳануз жиддий қийинчиликларга дуч келаётганини қайд этди.
Америка Савдо Палатаси Россияга қарши санкцияларнинг тез орада бекор қилинишига умид билдирган.
Шу билан бирга, Роберт Эйджи АҚШнинг амалдаги президенти Доналд Трамп Украина ва Россия ўртасида тинчлик шартномаси имзоламагунча чекловларни бекор қилишга рози бўлиши даргумонлигини қўшимча қилди.
