«SelectUSA» инвестиция саммити: Қозоғистон АҚШ бозорини забт этмоқда
Қозоғистон АҚШ бизнесини жалб қилиш билан бирга ўз лойиҳаларини АҚШ иқтисодий инфратузилмасига интеграция қилишга киришди.
Қозоғистон Марказий Осиё ва Жанубий Кавказ давлатлари ичида АҚШ ҳукуматининг инвестицияларни жалб қилиш бўйича асосий майдонларидан бири — «SelectUSA» инвестиция саммитида ўз лойиҳаларини тақдим этган биринчи мамлакат айланди. Бу ҳақда «Kazinform» ахборот агентлиги хабар берди.
Қайд этилишича, «стратегик секторлар ва АҚШ бозорига чиқиш имкониятлари» мавзусидаги давра суҳбати доирасида саноат, агротехнологиялар, соғлиқни сақлаш, озиқ-овқат саноати ва рақамли бизнес соҳасидаги 30 та Қозоғистон компанияси АҚШ бозори талабларига мослашиш ва кенгайишга йўналтирилган лойиҳаларини намойиш этган.
Тадбирда икки мамлакат бизнес доиралари, давлат тузилмалари ва инвестиция ҳамжамиятининг 120 га яқин вакили, жумладан, АҚШ Савдо вазирлиги ва минтақавий инвестиция агентликлари иштирок этган.
Янги бозор имкониятлари
Мулоқотнинг асосий мавзуси АҚШ бозорига чиқиш механизмлари: бизнесни локализация қилиш, тартибга солувчи талабларга мослашиш, шериклар излаш ва инвестицияларни жалб қилиш бўлган.
Учрашув Вашингтоннинг Қозоғистон хом ашё базасига, айниқса ўта муҳим минералларга бўлган қизиқиши ортган бир пайтда бўлиб ўтган.
Аввалроқ Астанага «Apple», «Boeing» ва «Chevron» каби йирик корпорациялар вакиллари ташриф буюриб, янги кооперация занжирларини муҳокама қилган эди.
