Сэм Алтманнинг қаршилигига қарамасдан «ChatGPT»да реклама жорий қилишмоқчи

«OpenAI» компанияси 2026 йил январ ойида АҚШдаги айрим фойдаланувчилар учун «ChatGPT» иловасида реклама жойлаштиришни тест тартибида бошлашини эълон қилди. Реклама, аввало, бепул версиядан фойдаланувчилар ва янги, арзонроқ «Go» тарифини танлаган абонентларга кўринади. Қимматроқ обуна пакетлари эса рекламаcиз қолади.

«Go» тарифи ойига 8 доллар этиб белгиланган бўлиб, аввал Ҳиндистонда ишга туширилган, энди эса АҚШ бозорига ҳам чиқарилмоқда. Компания таъкидлашича, рекламалар чат жавобларидан алоҳида, аниқ ажратилган ҳолда жойлаштирилади ва контентга бевосита аралашмайди. «OpenAI» бундай формат фойдаланувчиларга харид қарорларини онглироқ қабул қилишга ёрдам бериши мумкинлигини таъкидламоқда.

Бу қарор «OpenAI» учун стратегик аҳамиятга эга. «Bloomberg» нашрининг қайд этишича, компания кутилаётган IPO олдидан даромад манбаларини диверсификация қилишга ҳаракат қилмоқда. Шу билан бирга, сунъий интеллект инфратузилмаси жуда катта харажат талаб қилаяпти: маълумотларга кўра, «OpenAI» яқин йилларда дата-марказлар ва чиплар учун тахминан 1,4 трлн доллар сарфлаш мажбуриятини олган.

Ҳозирга қадар «ChatGPT» асосан обуналар ҳисобига яшаб келди. Ҳафталик аудиторияси 800 млн нафардан ошиб кетганига қарамай, компания яқин бир неча йил ичида фойдага чиқиши қийин экани айтиламоқда. Шу нуқтайи назардан, реклама — молиявий босимни юмшатиш воситаси сифатида қаралмоқда.

Қизиғи шундаки, «OpenAI» бош директори Сэм Алтман илгари рекламага нисбатан очиқча салбий муносабат билдирган. У буни «энг сўнгги чора» деб атаб, реклама чат-ботга бўлган ишончни сусайтириши мумкинлигидан хавотир билдирган эди. Алтманга кўра, фойдаланувчи жавоб ортида кимнинг пул тўлагани ҳақида ўйлаб қолиши хавфли тенденция.

Шу билан бирга, рақобат кучайиб бормоқда. Масалан, «Google» ўзининг сунъий интеллект маҳсулотларида реклама элементларини жорий этишни аллақачон бошлаган. Бу эса «OpenAI»ни тамойиллар ва молия ўртасида мураккаб танлов қилишга мажбур қилаётганини кўрсатади.