Сенат Трампнинг Эрон билан уруш олиб бориш ваколатини чеклаб қўймоқчи
АҚШ Сенати Доналд Трампнинг Эронга қарши ҳарбий ҳаракатларини Конгресс рухсатисиз бошлашини тақиқловчи резолюция қабул қилмоқчи. Демократлар вазият ўта хавфли эканидан огоҳлантирмоқда.
Келаси ҳафта АҚШ қонун чиқарувчилари Эрон билан урушни тўхтатиш ва президент Доналд Трампни ҳар қандай ҳарбий ҳаракатлар учун Конгресс рухсатини олишга мажбурловчи резолюцияни қабул қилишга яна уриниб кўради. Бу ҳақда Сенатдаги демократлар етакчиси Чак Шумер «CNN» телеканалига маълум қилди.
Жорий йилда демократлар бундай овоз беришни бошлаш учун аллақачон уч марта ҳаракат қилган, бироқ натижа бўлмаган. Шумернинг таъкидлашича, айниқса ҳозиргидек хавфли вазиятда Конгресс ўз ваколатини қайта тиклаши шарт. У ҳеч қайси президент, хоҳ демократ, хоҳ республикачи бўлсин, мамлакатни якка ўзи урушга тортмаслиги кераклигини таъкидлади.
Шумер Оқ уй билан алоқага чиқиб, президентнинг «бугун тунда бутун бир цивилизация ҳалок бўлади» деган таҳдиди ва сулҳ эълон қилиниши орасидаги таҳликали соатларда ўз хавотирларини билдирган. Бироқ у Трамп билан тўғридан тўғри гаплаша олмаган, чунки президент «банд» экани айтилган.
Сенаторлар Трампнинг уруш борасидаги қадамларини нафақат олдиндан айтиб бўлмайдиган, балки ўта хавфли деб баҳоламоқда.
Сулҳ эмас, сароб
Шумер сўнгги лаҳзаларда тузилган икки ҳафталик сулҳни кескин танқид қилиб, уни ўта «мўрт» ва стратегиясиз қадам деб атади. Унинг фикрича, бу ҳақиқий дипломатик ечим эмас.
«Ягона тўғри йўл — узоқ муддатли дипломатик ечимдир. Икки ҳафталик сулҳ ҳеч қандай режа эмас», — деб таъкидлади демократлар етакчиси. У ҳукуматнинг бу борада аниқ бир режаси йўқлигидан хавотирда.
Сенат вакили бундай қисқа муддатли келишувлар минтақадаги асосий муаммоларни ҳал қилмаслигини ва фақат вақтни чўзишга хизмат қилишини қўшимча қилди.
Аниқ мақсад йўқ
Сенаторнинг фикрича, Трамп маъмурияти Конгрессга урушнинг якуний мақсади ҳақида ҳанузгача қониқарли жавоб бермаган. Биринчи кундан бошлаб нимага эришилмоқчи экани номаълумлигича қолмоқда.
«Жадвал қандай? Бу қанча инсон ҳаёти ва молиявий ресурсларга тушади? Унда бу саволларга ҳеч қачон жавоб бўлмаган. Аслида, унинг жавоблари кундан-кунга ўзгариб бормоқда», — деди Чак Шумер.
Демократлар етакчиси Трампнинг бундай режасиз ва кутилмаган ҳаракатлари нафақат Яқин Шарқ, балки бутун АҚШ хавфсизлигини жиддий хатар остига қўяётганини таъкидлади.
