Шавкат Мирзиёев Трампни 80 ёшга тўлиши муносабати билан табриклади
Ўзбекистон президенти Шавкат Мирзиёев АҚШ президенти Доналд Трампни 80 ёшга тўлиши муносабати билан табриклаб, икки давлат ўртасидаги стратегик шерикликни янада мустаҳкамлаш ва ҳамкорликни янги босқичга олиб чиқишга тайёр эканини билдирди.
Шавкат Мирзиёев 14 июн куни АҚШ президенти Доналд Трампга юбилей муносабати билан табрик мактуби йўллади. Президент матбуот хизмати маълумотига кўра, давлат раҳбари унга мустаҳкам соғлиқ, оилавий бахт-саодат ва давлатчилик фаолиятида улкан муваффақиятлар тилаган.
Табрикда Америка халқига тинчлик, осойишталик ва фаровонлик тилаклари ҳам билдирилди. Шу билан бирга, Ўзбекистон ва АҚШ ўртасидаги муносабатлар сўнгги йилларда сезиларли даражада мустаҳкамланиб, мазмунан бойиб бораётгани алоҳида қайд этилди.
Мирзиёев икки мамлакат ўртасидаги алоқалар ўзаро ҳурмат, ишонч ва муштарак манфаатларга асосланган ҳолда изчил ривожланаётганини таъкидлади. Унинг фикрича, бугунги кунда Ўзбекистон–АҚШ муносабатлари ҳар қачонгидан ҳам амалий ва самарали тус олган.
Мактубда Ўзбекистоннинг АҚШ билан кўп қиррали ва стратегик шерикликка асосланган ҳамкорликни янада чуқурлаштиришдан манфаатдор экани билдирилди. Айниқса, савдо-иқтисодий ва инвестициявий алоқаларни янги босқичга олиб чиқиш устувор вазифалардан бири сифатида кўрсатилди.
Шунингдек, давлат раҳбари Доналд Трампнинг халқаро майдонда тинчлик ва барқарорликни таъминлашга қаратилган саъй-ҳаракатларини юқори баҳолади. Халқаро ва минтақавий платформалар доирасидаги кўп томонлама ҳамкорлик келгусида ҳам янги натижалар билан бойиб боришига ишонч билдирилди.
Мирзиёев стратегик шерикликнинг истиқболли йўналишларини муҳокама қилиш мақсадида Доналд Трампни Ўзбекистонга илк тарихий ташриф билан келишга таклиф қилди.
