Шавкат Мирзиёев Вашингтонда АҚШ Конгресси ва Сенати вакиллари билан учрашди

5 ноябр куни Вашингтон шаҳрида бўлиб турган Шавкат Мирзиёев АҚШ Конгресси Вакиллар палатаси аъзолари — Билл Хайзенга, Керол Миллер ва Сидни Камлагер-Довни билан учрашди. Суҳбат чоғида Ўзбекистон ва АҚШ ўртасидаги стратегик шерикликни янада чуқурлаштириш ҳамда парламентлараро ҳамкорликни кенгайтириш масалалари кўриб чиқилди.

Учрашувда Ўзбекистон билан АҚШ ўртасидаги стратегик шериклик муносабатларини янада мустаҳкамлаш, икки мамлакат парламентларининг амалий ҳамкорлигини кенгайтириш масалалари кўриб чиқилди.

Қонун чиқарувчи органлар ўртасидаги алоқалар жадал ривожланиб бораётгани, АҚШ Конгрессида Ўзбекистон билан ҳамкорлик бўйича кокус самарали фаолият олиб бораётгани мамнуният билан қайд этилди. Ҳар йили Вакиллар палатасида кокус кўмагида икки томонлама муносабатларни мустаҳкамлашга хизмат қилаётган Ўзбекистон кунлари ўтказиб келинмоқда.

Конгресс олий даражада эришилган, энг аввало, савдо-иқтисодий, инвестициявий ва маданий-гуманитар алоқаларни кенгайтиришга доир келишувларни амалга оширишга ҳар томонлама кўмаклашиши муҳим экани таъкидланди.

Ҳудудлараро алоқаларни кенгайтириш, конгрессменлар вакиллик қилаётган Ғарбий Виржиния, Мичиган ва Калифорния штатлари билан амалий ҳамкорликни йўлга қўйишга алоҳида эътибор қаратилди.

Учрашув якунида АҚШ Конгресси вакилларининг Ўзбекистонга ташрифини уюштириш, шунингдек, икки мамлакат ҳудудлари раҳбарлари бошчилигидаги ишбилармон доиралар делегацияларининг ўзаро ташрифларини ташкил этишга келишиб олинди.

Шу куни Президент Мирзиёев АҚШ Сенатининг Марказий Осиё бўйича кокус ҳамраиси, сенатор Стив Дейнс билан ҳам мулоқот қилди. Суҳбатда икки мамлакат ўртасидаги кўп қиррали ҳамкорлик ва стратегик шериклик муносабатларини ривожлантириш масалалари муҳокама этилди.

Давлат раҳбари Сенатдаги кокус фаолиятини юқори баҳолади ва сўнгги йилларда икки давлат ўртасидаги ҳамкорлик мисли кўрилмаган даражада кенгайганини таъкидлади. Охирги ойларда рекорд қийматдаги шартномалар имзолангани ва бу ташриф чоғида янги иқтисодий келишувлар имзоланиши режалаштирилгани маълум қилинди.

Шунингдек, сенатор Дейнс ва президент Мирзиёев ўзаро манфаатли лойиҳаларни амалга ошириш, хусусан, сенатор вакиллик қилаётган Монтана штати билан иқтисодий ҳамкорликни кенгайтиришга келишиб олдилар.

Томонлар минтақавий ва халқаро долзарб масалалар юзасидан ҳам фикр алмашдилар.

Эслатиб ўтамиз, Мирзиёев Мирзиёев Америка Қўшма Штатлари Президенти Доналд Трампнинг таклифига биноан 4 ноябр куни амалий ташриф билан Вашингтон шаҳрига етиб борган эди. Ташрифнинг асосий тадбирлари 5-6 ноябрь кунлари бўлиб ўтади. Ўзбекистон Президенти Америка Қўшма Штатлари Президенти Доналд Трамп билан учрашади ҳамда Марказий Осиё мамлакатлари ва АҚШ етакчиларининг «C5+1» форматидаги саммитида иштирок этади.