Шавкат Мирзиёевнинг Бишкекка амалий ташрифи якунланди

Ўзбекистон Республикаси Президенти Шавкат Мирзиёевнинг Бишкек шаҳрига амалий ташрифи якунланди.

Ташрифнинг асосий воқеаси Шанхай ҳамкорлик ташкилотига аъзо давлатлар раҳбарлари кенгашининг юбилей йиғилишидаги иштирок бўлди. Саммитда ШҲТнинг 25 йиллик тараққиёт йўли сарҳисоб қилиниб, ташкилот доирасидаги ҳамкорликни янада ривожлантиришнинг устувор йўналишлари муҳокама қилинди.

Шавкат Мирзиёев саноат кооперациясини чуқурлаштириш, транспорт алоқаларини ривожлантириш, рақамли технологиялар ва сунъий интеллектни жорий этиш, шунингдек, озиқ-овқат, сув ва энергетика хавфсизлигини мустаҳкамлаш бўйича қатор ташаббусларни илгари сурди.

Йиғилиш якунида Бишкек декларацияси ҳамда асосий йўналишларда ҳамкорликни кенгайтиришга қаратилган бир қатор муҳим ҳужжатлар қабул қилинди.

«ШҲТ плюс» доирасида ҳам таклифлар билдирилди

Ўзбекистон етакчиси БМТнинг адолатли кўп қутбли дунё тартиботини шакллантиришдаги ролига бағишланган «ШҲТ плюс» форматидаги учрашувда ҳам нутқ сўзлади.

Президент БМТнинг марказий ва мувофиқлаштирувчи ролини сақлаб қолиш муҳимлигини таъкидлаб, «ШҲТ плюс»ни минтақалараро мулоқот майдони сифатида ривожлантириш зарурлигини қайд этди.

Ташриф доирасида Шавкат Мирзиёев Хитой Халқ Республикаси Раиси Си Сзиньпин, Россия президенти Владимир Путин ва Покистон бош вазири Шаҳбоз Шариф билан музокаралар ўтказди.

Шунингдек, БМТ бош котиби Антониу Гутерриш ҳамда АҚШ президентининг Жанубий ва Марказий Осиё бўйича махсус вакили Серджио Гор билан учрашувлар бўлиб ўтди.

Бишкекда давлат раҳбари рафиқаси билан бирга VI Бутунжаҳон кўчманчилар ўйинларининг тантанали очилиш маросимида ҳам иштирок этди.

Тадбирлар якунига етгач, «Манас» халқаро аэропортида Ўзбекистон президенти ва рафиқасини Қирғиз Республикаси Вазирлар Маҳкамаси раиси — Президент Администрацияси раҳбари Адилбек Қосималиев ва бошқа расмийлар кузатиб қўйди.

Шавкат Мирзиёев Тошкент шаҳрига қайтиб келди.