Шахсий эҳтиёж учун товарларни божсиз олиб кириш нормалари қайта кўриб чиқилади

Ўзбекистон Республикаси Президентининг «Қонунчиликдаги ҳуқуқий бўшлиқларни бартараф этиш ва тартибга солиш юкини камайтириш тўғрисида»ги фармони қабул қилинди.

Адлия вазирлиги томонидан тайёрланган ҳужжатга кўра, амалда аҳамиятини йўқотган, такрорланадиган ёки замонавий талабларга жавоб бермайдиган 800 га яқин қонунчилик ҳужжати «тартибга солиш гилотинаси» орқали бекор қилинади.

Фармон доирасида мажбурий талабларни камайтириш ва тартибга солишни соддалаштириш бўйича йўл харитаси тасдиқланди. Унга кўра, тадбиркорлар учун молиявий операцияларни «E-aktiv» тизимида белгиловчи мажбурият бекор қилинади. Бу ўзгариш ҳисобот юкини камайтириб, бизнес учун янада қулай муҳит яратиши кутилмоқда.

Шунингдек, кўчмас мулкни гаровга қўйиш ҳуқуқини рўйхатга олишда давлат хизмати нархи икки бараварга қисқартилади. Тегишли тўловнинг арзонлашиши ипотека ва кредит операцияларига оид жараёнларни енгиллаштириши мумкин.

Қарор шахсий эҳтиёж учун республикага олиб кириладиган товарларнинг божсиз олиб кириш нормаларини тўлиқ қайта кўриб чиқишни ҳам назарда тутади.

Ҳукумат қарори билан 2025-йил 1-майдан бошлаб жисмоний шахслар томонидан шахсий эҳтиёжи учун нотижорат мақсадларида республикага олиб кириладиган товарларнинг божсиз олиб кириш нормалари белгиланган эди.

Жумладан,

Ҳаво транспортида — 1000 АҚШ доллари,

Темирйўл ва дарё транспортида — 500 АҚШ доллари,

Автомобил ва пиёда ўтказиш пунктлари орқали — 300 АҚШ долларигача қийматдаги товарларни шахсий эҳтиёж учун божсиз олиб кириш мумкин.

Шунингдек, Ер участкасига бўлган ҳуқуқини ўзидан келиб чиқмаган сабабларга кўра рўйхатдан ўтказа олмаган ногиронлиги бўлган шахсларга эса муқобил ҳужжатлар асосида солиқ имтиёзларидан фойдаланиш имконияти яратилади.