Солиқ қоидабузарликлари ҳақида хабар берганларга қанча пул мукофотлари тўланганлиги маълум қилинди
2025 йилда Ўзбекистонда фуқароларнинг солиқ назоратидаги фаоллиги ошиб, ҳуқуқбузарликлар ҳақидаги мурожаатларнинг сезиларли ўсишига сабаб бўлди.
2025 йил давомида «Солиқ» мобил иловасидаги «Солиқ ҳамкор» тизими орқали солиқ ҳуқуқбузарликлари ҳақида жами 112 минг 412 та мурожаат келиб тушган. Бу кўрсаткич фуқароларнинг солиқ интизомини таъминлашда фаол иштирок этаётганини кўрсатади. Мурожаатлар асосан савдо ва хизмат кўрсатиш соҳасидаги қонунбузарликлар билан боғлиқ бўлган.
Энг кўп аниқланган қонунбузарликлар
Келиб тушган мурожаатларнинг катта қисми — 101 минг 236 таси харидорга чек бермаслик ҳолатларига тўғри келади. Шунингдек, 4 минг 185 та ҳолатда тўловни пластик карта орқали қабул қилмаслик, 236 та ҳолатда эса пластик карта орқали тўлов учун харид суммасини сунъий ошириш ҳолатлари қайд этилган. Қолган 6 минг 755 та мурожаат турли бошқа солиқ ҳуқуқбузарликлари билан боғлиқ.
Бироқ мурожаатларнинг барчаси ҳам кўриб чиқилмаган. Хусусан, 56 минг 617 та мурожаат такрорий бўлгани ёки шикоят келиб тушган тадбиркорлик субъектида солиқ текшируви давом этаётгани сабабли рад этилган. Шу билан бирга, қолган мурожаатлар солиқ органлари томонидан атрофлича ўрганилган.
Аниқланган ҳолатлар асосида 49 минг 25 та сайёр солиқ текшируви ўтказилди. Натижаларга кўра, текширувларнинг 98,8 фоизида ҳуқуқбузарлик ҳолатлари ўз тасдиғини топган. Бу тизим орқали келиб тушаётган хабарларнинг самарали эканини кўрсатади.
Тўланган пул мукофотлари
Ҳуқуқбузарликлар ҳақида хабар берган фуқароларни рағбатлантириш мақсадида 48 минг 602 та ҳолат бўйича мукофот тўланган. Ундирилган жарима суммасининг 20 фоизи ҳисобидан жами 33,7 миллиард сўм фуқароларга йўналтирилган. Бу эса жамоатчилик назоратини кучайтиришда муҳим молиявий рағбат сифатида баҳоланмоқда.
