Sony «PlayStation» нархларини оширди
Sony глобал компонент танқислиги сабаб хотира карталари сотувини тўхтатиб, «PlayStation 5» нархини бутун дунё бўйлаб оширди.
Япониянинг Sony компанияси 2026 йил 27 мартдан бошлаб хотира карталарининг аксарияти бўйича буюртмаларни қабул қилишни тўхтатди. Бу қарор глобал таъминот занжиридаги узилишлар ва хомашё танқислиги билан изоҳланмоқда.
Компания маълум қилишича, CFexpress Type А ҳамда SDXC/SDHC туридаги карталар сотуви вақтинча чекланди. Айни пайтда фақат CFexpress Type B (960 ГБ) ва энг арзон сегментга мансуб SD-карталар ишлаб чиқаришда қолдирилган.
Мутахассислар таъкидлашича, ушбу қарорга асосий омиллардан бири — гелий танқислиги бўлиб, у Яқин Шарқдаги геосиёсий кескинлик фонида кучайган. Бу эса электрон компонентлар ишлаб чиқариш занжирига бевосита таъсир кўрсатмоқда.
Шу билан бирга, Sony ўзининг асосий маҳсулоти — «PlayStation 5» ўйин приставкалари нархини ҳам оширишини эълон қилди. Янги нархларга кўра, стандарт версия $650, Digital Edition $600 ва PS5 Pro версияси $900 этиб белгиланди.
Компания баёнотида нархлар ошиши жаҳон иқтисодиётидаги босим, инфляция ва ишлаб чиқариш харажатларининг ортиши билан боғлиқ экани қайд этилди. Бу сўнгги бир йил ичида иккинчи бор нарх оширилиши бўлиб, 2025 йил августида ҳам консол нархи $50га кўтарилган эди.
Экспертлар фикрича, мазкур қарор глобал электроника бозоридаги муаммолар сақланиб қолаётганини ва келгусида ҳам нархлар босими давом этиши мумкинлигини кўрсатади.