«SpaceX» дунёдаги энг йирик ракета — «Starship»ни муваффақиятли синовдан ўтказди
Мазкур парвоз лойиҳа тарихида ўн иккинчиси бўлди.
© ReutersАмериканинг «SpaceX» компанияси Ой ва Марсга одам ташишга мўлжалланган «Starship» ўта оғир космик тизимининг синов парвозини муваффақиятли амалга оширди. Мазкур тизим «Super Heavy V3» элтувчи ракетаси билан жиҳозланган.
Парвоз 22 май куни маҳаллий вақт билан 17:30 да Техас штатидаги Бока-Чика космодромида амалга оширилди. Дастлабки режага кўра, 21 май куни амалга оширилиши керак бўлган парвоз техник носозлик туфайли сўнгги лаҳзада бир суткага кечиктирилган.
Парвоз тафсилотлари
Парвоз бошланганидан етти дақиқа ўтиб, бустер (тезлаткич) «Starship»дан ажралди ва Мексика кўрфазига қўнди.
Кеманинг ўзи эса Ер атрофини тўлиқ бўлмаган орбита бўйлаб айланиб ўтди ва фазога 20 та имитацион йўлдош ҳамда иккита такомиллаштирилган «Starlink» сунъий йўлдошини олиб чиқди.
Шундан сўнг «Starship» орбитадан чиқиб, Ҳинд океанининг олдиндан белгиланган ҳудудида сувга қўнди. Умумий парвоз жараёни 65 дақиқа давом этди.
Мазкур парвоз «Starship» лойиҳаси тарихида ўн иккинчиси бўлди. Такомиллаштирилган «Raptor» двигателлари билан жиҳозланган ва «V3» номини олган учинчи авлод ракетаси учун эса бу илк синов парвози ҳисобланади. Бунгача амалга оширилган 11 та парвознинг олтитаси муваффақиятли деб топилган.
Маълумот учун, кўп марта фойдаланишга мўлжалланган «Starship V3» ракета-космик тизими инсоният тарихидаги энг йирик ва энг кучли ракета саналади. Унинг баландлиги 124 метрни ташкил этади.
