Суд Трампнинг Оқ уйдаги 400 млн долларлик базмлар зали қурилишини тақиқлади
Федерал судя Трампнинг Оқ уйда янги зал қуриш режасини тўхтатди. Судя президент бинонинг эгаси эмас, балки вақтинчалик бошқарувчиси эканини эслатди.
Судя Ричард Леон Оқ уйнинг Шарқий қанотини (East Wing) бузиб, ўрнига ҳашаматли зал қуриш режасига нисбатан кескин фикр билдирди. Унинг таъкидлашича, АҚШ президенти Оқ уйнинг вақтинчалик бошқарувчиси ва келажак авлодлар учун унинг меросхўридир, аммо мулкдори эмас.
«Ҳеч бир қонун президентга у даъво қилаётган бундай кенг ваколатларни бермайди», — деди судя. У маъмуриятнинг «бинони яхшилаш ва ўзгартириш» ҳақидаги важларини рад этиб, бундай мантиқ билан президент Оқ уйни бузиб, ўрнига замонавий осмонўпар бино қуриши ҳам мумкин бўлиб қолишини қайд этди ва буни «ҳаддан ташқари киборлик билан қилинган талқин», деб атади, деб ёзмоқда BBC.
Тарихий меросни сақлаб қолиш ғалабаси
Мазкур даъво Тарихий меросни сақлаш миллий фонди (National Trust for Historic Preservation) томонидан киритилган эди. Фонд раҳбари Кэрол Квиллен суд қарорини «Америка халқининг ғалабаси» деб атади ва лойиҳа Конгресс рухсатини олгунга қадар тўхтатилиши кераклигини таъкидлади.
Трампнинг лойиҳаси Оқ уйнинг асосий қароргоҳи майдонидан қарийб икки баравар катта бўлиб, у президентнинг энг устувор режаларидан бирига айланган эди. Оқ уй маъмурияти лойиҳани хавфсизлик нуқтаи назаридан асослашга уринган бўлса-да, судя бунга шубҳа билан қаради. Унинг фикрича, Оқ уй ёнидаги «улкан чоҳ» хавфсизлик муаммоси бўлса, уни президентнинг ўзи юзага келтирган.
Ҳозир суд фақат хавфсизликни таъминлаш билан боғлиқ зарур техник ишларни давом эттиришга ижозат берди, қолган барча қурилиш ишлари эса номаълум муддатга музлатилди.
Кейинги қадамлар
Доналд Трамп суд қарорини «мутлақо нотўғри» деб атади ва маъмурият ушбу қарор устидан шикоят қилишини эълон қилди. Ҳозирча суд фақат хавфсизлик билан боғлиқ ишларни давом эттиришга рухсат берди.
Мутахассисларнинг фикрича, бу иш Олий судгача етиб бориши мумкин. Трамп лойиҳанинг бир қисми, жумладан ҳимоя элементлари барибир қурилишини таъкидламоқда. Бироқ Конгресс билан молиявий ва ҳуқуқий келишмовчилик президентнинг «архитектуравий амбициялари» йўлида жиддий тўсиқ бўлиб қолмоқда.
