Сурхондарёлик эркак овқат тайёрламаган хотинини ўлдирди
Сариосиё туманида эр-хотин ўртасидаги оилавий жанжал фожиага айланди.
Сурхондарё вилоятида 71 ёшли эркак овқат тайёрламаган хотинини ўлдирди. Бу ҳақда «Nemolchi.uz» телеграм канали хабар берди.
Маълумотларга кўра, 15 сентябр куни соат 14:30 атрофида Сариосиё туманидаги Афросиёб маҳалласида эр-хотин ўртасида жанжал келиб чиққан. Эркак овқат йўқлигидан норози бўлган, аёл эса унинг уйдаги ишларга мутлақо ёрдам бермаслигини айтган. Шиддат билан кучайган можарода эркак ошхона пичоғини олиб, ҳовлига чиққан ва хотинининг чап кўкрагига икки марта зарба берган. Аёл олган оғир жароҳатлар туфайли воқеа жойида вафот этган.
Тергов маълумотларига кўра, марҳума биринчи гуруҳ ногирони бўлган ва сурункали буйрак касаллигидан азият чеккан. Хотинининг оғир аҳволига қарамай, эркак аёл «уни мунтазам равишда хўрлаганини» айтган . У судда айбини тўлиқ тан олган ва воқеани «доимий тушунмовчиликлар» билан изоҳлаган.
Суд эркакнинг ҳаракатларини қасддан одам ўлдириш сифатида баҳолаб, умумий тартибли колонияда 10 йил озодликдан маҳрум қилиш ҳақида ҳукм чиқарди.
