Tesla акциялари 10 йил ичида 10 000 долларга етиши мумкин

Baron Capital асосчиси ва Tesla акцияларини 10 йилдан буён сақлаб келаётган Рон Барон, янги сўзларида Tesla акциялари 2035 йилга бориб 10 000 долларгача кўтарилиши мумкинлигини билдирди. Бозор ҳали ҳам Илон Маскнинг режалари миқёсини тўлиқ тушуниб етмаган, дея унинг сўзларини келтирмоқда investing.com.

Бароннинг айтишича, Tesla ходимлари Маск етакчилигидаги лойиҳалар кейинги 10 йилда камида 5–7 баробар фойда келтиради, деб ҳисоблашмоқда. У ўз прогнозида акциялар нархи яқин орада 2500 долларгача кўтарилиб, келгусида яна тўрт баравар ўсиши мумкинлигини таъкидлади.

Интервюда Барон махсус Tesla’нинг Optimus одамсимон роботи ҳақида ҳам гапирди. Маскнинг ўзи ҳам уни компаниянинг энг қимматли маҳсулотларидан бирига айланишини кутмоқда. Бароннинг сўзларига кўра, Tesla 2026 йилда 10 млн робот, кейинги босқичда эса йилига 1 млрдгача Optimus ишлаб чиқаришни режалаштирмоқда. Битта робот тахминан 20 000 доллар туради.

Барон буни «барқарор фаровонлик» сари қадам деб баҳолади: арзон робот меҳнати одамлар ҳаёти сифатини сезиларли яхшилаши мумкин. Шу билан бирга, Маск одамзотни Марсда яшашга олиб бориш ғоясидан ҳам воз кечмаганини эслатди.

Tesla’нинг СИ ва робототехника соҳасидаги амбицияларига бўлган қизиқиш кучаймоқда. Яқинда акционерлар Маскнинг янги компенсация режасини маъқуллашди, у эса Optimus ва автоном бошқарув атрофидаги тақдимотларни кучайтирди.

Bank of America таҳлилчи Федерико Меренди ҳам Tesla’ни «физик сунъий интеллект соҳасида етакчи» деб атаб, акциялар нархини 471 долларгача кўтарди. Унинг таъкидлашича, Tesla ўзининг автоном бошқарув ва роботлашган технологиялар орқали бозордаги етакчиликни мустаҳкамламоқда.

Бароннинг фикрича, Tesla’нинг келаси 10 йилдаги қиймат яратиши айнан шу технологияларга боғлиқ бўлади — биргина электромобилларга эмас.