Tesla иккита моделини ишлаб чиқаришни тўхтатади

Tesla компанияси ўзининг флагман электромобиллари ҳисобланган «Model S» ва «Model X» моделларини ишлаб чиқаришни босқичма-босқич тўхтатишга қарор қилди. Компания маълумотларига кўра, ушбу моделлар ўрнида заводларда одамсимон гуманоид роботларни йиғиш бошланади. Қолдиқ автомобиллар сотиб тугатилгандан сўнг, «Model S» ва «Model X» бозордан бутунлай чиқарилади.

Сабаблар

Tesla раҳбари Илон Маскнинг таъкидлашича, компаниянинг «келажакка ишонч билан қараб ҳаракатланиши» айнан шу қарорга олиб келган. Унинг сўзларига кўра, Tesla аввало автоном бошқарув ва сунъий интеллектга асосланган янги технологияларга эътибор қаратмоқда. Шу сабабли электромобиллар конвейерлари 2027 йилда ишлаб чиқарилиши режалаштирилган бренд гуманоид роботларини йиғишга мослаштирилади.

Моделлар тарихи

Маск «Model S» ва «Model X» дастурини «муносиб якунлаш вақти келгани»ни таъкидлаб, компания энди тўлиқ автоном тизимларга таянадиган келажак сари ҳаракатланаётганини билдирди. Ушбу автомобиллар омборларда мавжуд бўлган пайтда сотувда қолади, шунингдек, Tesla уларни бозорда бўлган давр мобайнида техник қўллаб-қувватлашни давом эттиришини ваъда қилмоқда.

«Model S» Tesla'нинг 2012 йилдан бери ишлаб чиқарилаётган иккинчи модели, «Model X» эса 2015 йилдан бозорга чиқарилган. Аммо йиллар ўтиши билан ушбу моделларнинг оммабоплиги пасайди. Айни пайтда компания сотувларининг асосий улуши арзонроқ ва оммавий «Model 3» ҳамда «Model Y» ҳиссасига тўғри келмоқда.

Ишлаб чиқариш ҳажми

2025 йил давомида Tesla 1 миллион 585 минг 279 та «Model 3» ва «Model Y» автомобилларини етказиб берган бўлса, «Model S» ва «Model X» сотуви 418 минг 227 тани ташкил этган. Шунингдек, 2025 йил ўртасида компания Хитой бозорида ҳам ушбу моделлар сотувини тўхтатишга мажбур бўлган. Бунга АҚШдан импорт қилинадиган автомобилларга нисбатан жорий этилган Хитой божлари сабаб бўлган.

Эслатиб ўтамиз, аввалроқ Tesla 14 февралдан бошлаб автобошқарув дастурини фақат ойлик обуна асосида таклиф қилиши ҳақида хабар берилганди.