Time журналидан сенсация: сунъий интеллект яратувчилари «Йил одами» бўлди
Сунъий интеллект яратувчилари Американинг Time журнали томонидан 2025 йилнинг «Йил одамлари» деб тан олинди.
Time журнали 2025 йилнинг «Йил одами» сифатида сунъий интеллект яратувчиларини танлади. Нашр таъкидлашича, жорий йилда сунъий интеллект салоҳияти тўлиқ намоён бўлиб, инсоният энди қайтиш нуқтасидан ўтиб бўлгани яққол кўринди.
«2025 йил сунъий интеллектнинг бутун салоҳияти тўлиқ намоён бўлган ва ортга қайтиш имконсизлиги аниқ бўлган йил эди. Фикрловчи машиналар даври воқеликка айлангани учун; инсониятни ҳайратга солиши ва хавотирга солгани учун; бугунги кунни ўзгартириши ва инсоннинг имкониятлари чегараларини кенгайтирганини ҳисобга олиб, Time журнали 2025 йилнинг инсонлари сифатида сунъий интеллект меъморларини танлади», - деб ёзилган журналнинг ижтимоий тармоқлардаги саҳифасида.
Журнал муқовасида Мета раҳбари Марк Цукерберг, AMD бош директори Лиза Су, хAI, SpaceX ва Tesla раҳбари Илон Маск, Nvidia раҳбари Женсен Хуан, OpenAI раҳбари Сем Алтман, DeepMind бош директори Демис Хассабис, Anthropic раҳбари Дарио Амодей ва ImgaeNet асосчиси Фэй-Фэй Ли тасвирланган.
Уларнинг барчаси пўлат тўсин устида ўтирибди, тасвир эса 1932 йилда олинган «Осмонўпар бинодаги тушлик» суратига ишора қилади.
Time журнали 1927 йилдан буён ўтган 12 ой ичида дунёга энг катта таъсир кўрсатган шахс, гуруҳ ёки ғояни «яхшилик ёки ёмонлик учун» деб эътироф этиб келади.
2024 йилда бу унвонга АҚШ президенти Доналд Трамп сазовор бўлди.
