Тожикистон президентининг қизи тиббиёт фанлари номзоди бўлди
Тожикистон раҳбари Эмомали Раҳмоннинг кенжа қизи Фарзона Эмомали тиббиёт соҳасидаги номзодлик диссертациясини муваффақиятли ҳимоя қилди. Унинг илмий иши қайси муҳим йўналишга бағишлангани маълум қилинди.
Тожикистон Соғлиқни сақлаш вазирлигининг Ислоҳотлар, бирламчи тиббий-санитария ёрдами ва халқаро алоқалар бошқармаси бошлиғи Фарзона Эмомали расман тиббиёт фанлари номзоди илмий даражасини олди.
Вазирлик матбуот хизмати хабарига кўра, у «Тиббиёт марказларида болалар ва ўсмирларга тиббий ҳамда ижтимоий хизмат кўрсатишнинг замонавий жиҳатлари» мавзусидаги диссертациясини муваффақиятли ҳимоя қилган. Илмий ишга тиббиёт фанлари доктори, профессор Зоир Набиев раҳбарлик қилган.
Илмий ишнинг асосий моҳияти
Фарзона Эмомалининг тадқиқот иши Тожикистондаги тиббиёт марказларида бирламчи ёрдамни яхшилаш ҳамда болалар ва ўсмирлар учун интеграциялашган тиббий-ижтимоий хизматларни жорий этишга қаратилган. Олимнинг ўз ишида таъкидлашича, болаларнинг саломатлиги оиланинг ижтимоий ҳолати, ота-оналарнинг таълим даражаси ва сифатли тиббий хизматлардан фойдаланиш имконияти каби кўплаб муҳим омилларга бевосита боғлиқдир.
Ушбу омиллар бола шахсиятининг ривожланишига кучли таъсир кўрсатади ва шу сабабли ёрдам кўрсатишнинг самарали моделларини ишлаб чиқиш муҳим аҳамият касб этади. Тадқиқотчининг илмий фаолияти 15 та илмий мақолада ўз аксини топган бўлиб, уларнинг тўққизтаси бевосита диссертация мавзуси билан боғлиқ.
Фарзона Эмомали ҳақида нималар маълум?
Президентнинг кенжа қизи Фарзона Эмомали 1998 йил 4 июлда Душанбе шаҳрида туғилган. У 2014 йилда Душанбедаги М.В.Ломоносов номидаги МДУ лицейи филиалини аъло баҳоларга битирган. Сўнгра, 2020 йилда Абу Али ибн Сино номидаги Тожикистон давлат тиббиёт университетининг даволаш факултетини имтиёзли диплом билан тамомлаган.
2022 йилда «Педиатрия» мутахассислиги бўйича клиник ординатурани ўтаган бўлса, 2023 йилда Президент ҳузуридаги Давлат бошқаруви академиясини «давлат бошқаруви» йўналиши бўйича аъло баҳоларга битирди.
Меҳнат фаолиятини 2021 йилда Соғлиқни сақлаш вазирлиги аппаратида бошлаган Фарзона Эмомали 2025 йилнинг августида вазирликнинг Ислоҳотлар, бирламчи тиббий-санитария ёрдами ва халқаро алоқалар бошқармаси бошлиғи лавозимига тайинланган.
