Тожикистон Россиядан ҳарбий ёрдам сўраганини рад этди

Тожикистон Ташқи ишлар вазирлиги Душанбенинг Коллектив хавфсизлик шартномаси ташкилоти (КХШТ) билан Россия ҳарбийларини Афғонистон чегарасини қўриқлашга жалб этиш бўйича музокаралар олиб бораётгани ҳақидаги хабарларни расман рад этди.

Вазирлик ушбу маълумотни ёлғон ва ҳақиқатга тўғри келмаслигини таъкидлаб, бундай хабарлар тарқатилиши халқаро ҳамжамиятни чалғитишини айтди. ТИВ таъкидлашича, республика давлат чегарасини ишончли ҳимоялаш учун мустақил равишда барча зарур чора-тадбирларни кўрмоқда.

«Давлат чегарасидаги вазият барқарор бўлиб, Тожикистон Республикасининг ваколатли органлари томонидан тўлиқ назорат остида турибди», - дея таъкидланди вазирлик баёнотида.

3 декабр куни Reuters ахборот агентлиги куч тузилмаларидаги учта манбага асосланиб, Тожикистон ҳукумати Россия ҳарбийларини Тожикистон-Афғонистон чегарасини биргаликда назорат қилишга жалб этиш имкониятини муҳокама қилаётгани ҳақида хабар тарқатган эди. Тожикистон томонининг расмий баёнотидан сўнг Reuters ўз материалини қайтариб олди ва бу қарорни матнда келтирилган фактларни тасдиқловчи етарли далиллар йўқлиги билан изоҳлади.

Тожикистон-Афғонистон чегарасидаги вазият ноябр ойи охирида кескинлашди, икки воқеа натижасида Хитойнинг беш фуқароси ҳалок бўлди. 26 ноябр куни «Shohin SM» компаниясининг уч ходими дрон ҳужуми оқибатида, 30 ноябр куни эса Афғонистон ҳудудидан ўққа тутилиши оқибатида China Road and Bridge Corporation компаниясининг икки ходими ҳалок бўлди. Хитой элчихонаси Тожикистон расмийлари билан шошилинч музокаралар ўтказди ва Хитой корхоналарига чегара ҳудудларидан ходимларини эвакуация қилишни тавсия этди.

2 декабр куни Тожикистон ва Афғонистон ташқи ишлар вазирлари раҳбарлари хавфсизлик бўйича қўшма қўмиталар тузиш ва чегарачилар ўртасида доимий алоқаларни йўлга қўйишга келишиб олишди. Томонлар ҳужумлар учун жавобгарликни Кобул ва Душанбе ўртасидаги ишончни барбод қилишга уринаётган «нохолис гуруҳлар» зиммасига юклади.