Tojikiston va Qozog‘iston o‘rtasidagi tovar ayirboshlash hajmi yarim yilda 770 mln dollarga yetdi

2026-yilning dastlabki olti oyida Tojikiston va Qozog‘iston o‘rtasidagi savdo hajmi 770,1 mln dollarni tashkil etdi. Bu o‘tgan yilning shu davriga nisbatan 192,1 mln dollarga (33,2 foiz) ko‘p. Bu haqda Tojikiston Statistika agentligi xabar berdi.

Qozog‘iston Tojikistonning Xitoy va Rossiyadan keyingi uchinchi yirik savdo hamkoriga aylandi. 2026-yilning yanvar-iyun oylarida Tojikistonning umumiy tashqi savdo hajmi 6,82 mlrd dollar bo‘lgan.

Shu davrda Tojikiston Qozog‘istondan 712,9 mln dollarlik mahsulot import qildi. O‘tgan yili bu ko‘rsatkich 538,4 mln dollar edi. Demak, import 32,4 foizga oshgan.

Tojikistonning Qozog‘istonga eksporti ham o‘sdi — 39,7 mln dollardan 57,2 mln dollargacha, ya’ni 44,3 foizga. Natijada Qozog‘iston Tojikistonning umumiy importining 13,6 foizini, eksportining esa 3,6 foizini tashkil etdi.

Tojikiston Qozog‘istondan nimalarni ko‘proq import qilmoqda?

2026-yilning birinchi yarmida Tojikiston Qozog‘istondan asosan bug‘doy, armatura, suyultirilgan gaz (propan va butan), alyuminiy oksidlari, o‘simlik yog‘lari import qildi. Ayrim mahsulotlar importi sezilarli oshgan. Xususan, armatura, propan, butan, raps yog‘i va kartoshka importi ko‘paygan.

Eslatib o‘tamiz, avvalroq Tojikiston budjet xarajatlarining qariyb 40 foizini ish haqi va ijtimoiy nafaqalarga sarflagani haqida yozgan edik.