Tojikistonda benzin va dizel narxi keskin qimmatlashdi

Tojikistonda benzin va dizel yoqilg‘isi narxining navbatdagi oshishi kuzatildi. Dushanbe shahridagi yoqilg‘i quyish shoxobchalarida 9-iyun holatiga ko‘ra, eng talab yuqori bo‘lgan AI-92 benzinining bir litri 11,3 somonidan sotilmoqda.

Bu ko‘rsatkich bir hafta avval 10,9 somonini tashkil etgan bo‘lsa, uch hafta muqaddam 10,4 somon bo‘lgan. Shu tariqa, qisqa vaqt ichida benzin narxi qariyb 9 foizga oshgan.

Dizel yoqilg‘isi narxi

Dizel yoqilg‘isi ham ancha qimmatlashdi. Agar o‘tgan haftada uning bir litri 11 somonidan taklif qilingan bo‘lsa, hozirda narx 13,3 somoniga yetgan. Bu esa transport va logistika xarajatlarining yanada o‘sishiga olib kelishi mumkin.

Yoqilg‘i quyish shoxobchalari xodimlari narx oshishining sabablari haqida ma’lumotga ega emasliklarini bildirgan. Shu bilan birga, mamlakatda benzin va dizel tanqisligi kuzatilayotgani yo‘q.

Hukumat aytgan sabab

Tojikistonning Monopoliyaga qarshi xizmati narxlar oshishini xalqaro bozordagi vaziyat bilan bog‘lamoqda. Idora ma’lumotiga ko‘ra, mamlakat yoqilg‘ini import qilgani uchun uning qiymati tashqi bozordagi o‘zgarishlarga bevosita bog‘liq. Xususan, Yaqin Sharqdagi mojarolar neft mahsulotlari narxiga ta’sir ko‘rsatmoqda.

Joriy yilning mart va aprel oylarida ham shu omillar tufayli yoqilg‘i narxlari ko‘tarilgan edi. Tojikiston Statistika agentligi ma’lumotlariga ko‘ra, 2026 yilning birinchi choragida mamlakatga 325 ming tonnadan ortiq neft mahsulotlari import qilingan. Import hajmi o‘tgan yilning shu davriga nisbatan 11,4 foizga, qiymati esa 8,6 foizga oshgan.

Tojikiston uchun asosiy yoqilg‘i yetkazib beruvchi davlat Rossiya bo‘lib qolmoqda. Shuningdek, mamlakat Qozog‘iston, O‘zbekiston va Turkmanistondan ham ma’lum hajmda neft mahsulotlarini import qiladi.