Тожикистонда тирбандликни камайтириш учун рақамли технологиялар жорий этилиши мумкин
Европа тикланиш ва тараққиёт банки делегацияси билан Душанбе транспорт инфратузилмасини ривожлантириш муҳокама қилинди.
Душанбе шаҳар ҳокими ўринбосари Раҳмиддин Саломзода Европа тикланиш ва тараққиёт банки (ЕТТБ) делегацияси билан Тожикистон пойтахтининг транспорт инфратузилмасини ривожлантириш ва ҳамкорликни кенгайтириш масалаларини муҳокама қилди.
Учрашув давомида Душанбе транспорт тизимини модернизация қилиш ҳамда шаҳар маъмурияти ва ЕТТБ ўртасидаги ҳамкорликни мустаҳкамлаш режалари кўриб чиқилди. Хусусан, йўл-транспорт лойиҳаларини амалга ошириш, транспорт оқимини моделлаштириш ва бошқариш учун замонавий рақамли технологияларни жорий этиш, шунингдек, шаҳардаги тирбандликларни камайтириш чоралари муҳокама қилинди.
Томонлар шаҳар транспорти хизматларининг самарадорлиги ва барқарорлигини ошириш мақсадида халқаро илғор тажрибаларни қўллаш бўйича ҳам фикр алмашди.
Музокаралар якунида томонлар Душанбе инфратузилмасини яхшилаш ва транспорт шароитларини ривожлантиришга қаратилган қўшма ташаббусларни илгари суришга содиқлигини тасдиқлади ҳамда ҳамкорликни давом эттириш муҳимлигини таъкидлади.
