Тошкентда Трамп устидан шикоят қилиб «102»га қўнғироқ қилган эркак жазоланди
Бектемир туманида маст ҳолда АҚШ президенти устидан шикоят қилиб, махсус хизматларни чалғитган фуқаро жаримага тортилди.
Тошкент шаҳри Бектемир туманида «102» рақамига асоссиз қўнғироқ қилиб, Доналд Трамп устидан шикоят қилган фуқаро маъмурий жавобгарликка тортилди. Vaqt.uz суд ҳужжатлари билан танишди. Суд қарорига кўра, у махсус хизматларни қасддан алдаб чақирганликда айбдор деб топилди.
Ҳодиса 7 январ куни Жиноят ишлари бўйича Бектемир туман судида кўриб чиқилган. Суд ҳужжатларида қайд этилишича, фуқаро маст ҳолатда «102» рақамига қўнғироқ қилиб, АҚШ президенти гўёки одам ўғирлаб кетгани ва Оқ уйда яшашини айтиб, унга нисбатан ариза қабул қилишни талаб қилган.
Мазкур қўнғироқ орқали у ички ишлар органлари фаолиятига асоссиз аралашиб, махсус хизматларни чалғитган ҳамда жамоат тартибини бузган. Шунингдек, у суриштирув ишларини олиб бориш мақсадида ички ишлар органлари ходимлари томонидан берилган қонуний талабларга бўйсунмаган.
Суд мажлисида ҳуқуқбузар ўз айбига тўлиқ иқрор бўлган. У спиртли ичимлик истеъмол қилганини, қўнғироқ вақтида айтган гапларини аниқ эслай олмаслигини маълум қилган. Шу билан бирга, ўз ҳаракатларининг оқибатларини англамаганини билдирган.
Фуқаро қилган ишидан пушаймон эканини, бундай ҳолат келгусида такрорланмаслигини айтган ва суддан енгилроқ жазо тайинлашни сўраган. Бироқ суд унинг қилмиши жамоат хавфсизлиги ва тартибига жиддий халал берганини инобатга олган.
Суд қарори билан у Маъмурий жавобгарлик тўғрисидаги кодекснинг 199-моддасига мувофиқ айбдор деб топилиб, базавий ҳисоблаш миқдорининг уч баравари, яъни 1 миллион 230 минг сўм миқдорида жарима жазосига ҳукм қилинди.
