Трамп божлар бўйича танқидчиларни аҳмоқ деб атади
АҚШ президенти Доналд Трамп импорт божлари бўйича баёнот берди ва уруш сифатида баҳоланаётган суд жараёни ортидан аҳолига 2000 доллар ваъда қилди, бу сиёсий босим манзарасида айтилди.
АҚШ президенти Доналд Трамп ташқи савдо божларини танқид қилувчиларни «тентак» деб атади ва импорт тарифлари мамлакатга «триллионлаб доллар фойда келтирганини» иддао қилди. Унинг айтишича, ҳукумат ушбу даромаддан ҳар бир америкаликка 2000 доллар миқдорида тўлов амалга ошириши мумкин. Бироқ Трамп бу ташаббус бойликка эга юқори даромадли қатламга тааллуқли эмаслигини алоҳида таъкидлади.
Бу баёнот мамлакат Олий судида тарифларнинг қонунийлиги муҳокама қилинаётган бир пайтда янгради. Судялар президентнинг Конгресс ваколатларини чекловсиз ўзлаштиргани эҳтимоли юзасидан жиддий саволлар бергани маълум қилинди. АҚШ қонунчилигига кўра, ташқи савдо тарифлари ва божлар тартиби асосан Конгресс ваколатига киради. Шу боис, суд қарорининг мамлакат иқтисодий сиёсатга таъсири катта бўлиши кутилмоқда.
Олий судда ўтган дастлабки эшитувларда айрим судялар Трампнинг фавқулодда ҳолатга таянишини асоссиз деб баҳолади. Шунга қарамай, унга яқин мухлислар ва MAGA ҳаракати тарафдорлари тарифларни мамлакат иқтисодий мустақиллиги учун муҳим, деб ҳисобламоқда. Бироқ жамоатчилик кайфияти умумий тарзда иккига бўлинган, айниқса инфляция юқори бўлган бир вазиятда.
Иқтисодчи Ботир Қобиловнинг таъкидлашича, ҳукуматнинг 2000 долларлик тўлов ҳақидаги баёноти суд қароридан олдинги «сигнал» сифатида кўрилиши мумкин. Унинг фикрича, аввало халқдан бож йиғиш, кейин унинг бир қисмини қайта тарқатиш — бу иқтисодий манипуляция ҳисобланади.
Қобиловга кўра, бундай сиёсий харакатлар инфляцияни янада кучайтириши ва бозорда янги беқарорлик келтириб чиқариши мумкин.
