Трамп: Эрон «яхши шоу» қўймоқда

АҚШ президенти Доналд Трамп Мўжтаба Хоманаий ҳалок бўлгани ҳақидаги хабарларга ишонмаслигини билдирди. Унинг айтишича, Эрон олий раҳбари оғир жароҳатланган, аммо тирик.

«Мен Мўжтаба Хоманаий ўлган деб ўйламайман. У жуда оғир яраланган — танасининг чап томони, қўли, оёғи, ҳаммаси жиддий шикастланган. Аммо мен уни ўлган деб ўйламайман», — деди Трамп.

АҚШ раҳбари, шунингдек, Эрон томонининг ҳаракатларини ҳам танқид қилди.

«Борди-ю, у вафот этган бўлса, унда улар яхши томоша қўйишяпти», — деди у.

Трампнинг Эрон ҳақида бошқа фикрлари

Трамп Эрон ҳақида гапирар экан, мамлакатдаги вазият яқин орада АҚШ учун йирик натижа билан якунланишини билдирди.

«Тез орада Эронда бизни катта ғалаба кутиб турибди», — деди Америка президенти.

У Эрон билан боғлиқ операцияларда АҚШ устунликка эга бўлганини ҳам таъкидлади.

«Биз ҳақиқатан ҳам бошиданоқ Эрон устидан тўлиқ устунлик қилдик», — деди Трамп.

Бўғозда нефт оқими

АҚШ президенти минтақадаги денгиз қатнови ҳақида ҳам гапирди.

Трампнинг айтишича, бўғоз амалда ишлаяпти ва ундан катта ҳажмда нефт ташилмоқда. Шу билан бирга, у вақт-вақти билан дронлар, ракеталар ёки бошқа қуроллар қўлланилаётганини қайд этди.

«Биз миналардан халос бўлдик. Бўғоз эса ишлаяпти. Ҳа, вақт-вақти билан у ерда дрон, ракета ёки бошқа нарса учирилади, аммо бўғоз аъло даражада ишлаяпти. У ердан жуда катта нефт оқими ўтяпти», — деди Трамп.