Трамп Путиндан Зеленский билан учрашишни талаб қилмаслигини айтди

АҚШ президенти Доналд Трамп брифингда Владимир Путин билан учрашиш учун ундан Украина президенти Володимир Зеленский билан алоҳида мулоқот ўтказишни талаб қилгани ҳақидаги аввалги хабарларни инкор этди. Журналистлар саволига у қисқа жавоб қайтарди: «Йўқ». Шунингдек, Трампдан Кремлга қўйилган 8 августга қадар Украинада оташкесим эълон қилиш талаби ҳануз кучдами, деб сўрашди. АҚШ раҳбари бу масала Путиннинг позициясига боғлиқ бўлишини айтиб, аниқ жавоб бермади. Аввалроқ The New York Post манбалари Трамп Путин билан учрашишга фақат у Зеленский билан ҳам кўришишга рози бўлсагина тайёр эканини хабар қилганди. Манбаларга кўра, музокара жойи ҳали белгиланмаган. 6 август куни Трампнинг махсус вакили Стив Уиткофф Москвага ташриф буюриб, Путин билан учрашди. Ортидан Оқ уй Путин АҚШ президенти билан шахсан кўришиш истагини билдирганини маълум қилди. Шундан сўнг Трамп Зеленский, Европа етакчилари ва НАТО бош котиби билан телефон орқали мулоқот қилди. The New York Times ва Financial Times маълумотича, Трамп Путин билан келаси ҳафта учрашиб, кейин Зеленский иштирокида уч томонлама саммит ўтказиш ниятини билдирган. Bloomberg манбаларига кўра, Трамп бу режадан Украинадаги можарони тинч йўл билан ҳал қилишда муҳим қадам сифатида умидвор эканини айтган. Шу билан бирга, Путин сулҳга рози бўлиши учун ҳудудлар алмашинуви муҳокамаси мумкинлигини тақдим қилган. Аммо қайси ҳудудлар назарда тутилгани очиқланмаган. Путин эса Трамп билан учрашишга тайёрлигини, аммо Зеленский билан музокаралар учун ҳали шарт-шароит йўқлигини айтди. Июл охирида Трамп Кремлга 8 августга қадар Украинадаги урушни тўхтатишни талаб қилиб, акс ҳолда Россия нефт-газини сотиб олувчи давлатлар маҳсулотларига 100 фоизлик бож жорий этиш билан таҳдид қилган эди.