Трамп режаси ортидан нефт нархи кескин ошди

АҚШ ва Эрон ўртасидаги музокаралар келишувсиз якунланганидан сўнг, президент Доналд Трамп Эрон портларини тўсиб қўйиш ниятини билдирди. Бу эса глобал энергетика бозорида кескин реакцияга сабаб бўлди. Бу ҳақда BBC маълум қилди.

Энергетика инқирози

Осиё бозорлари қайта очилиши билан нефт нархлари кескин ошди. Brent crude маркали нефт 7,3 фоизга қимматлашиб, бир баррели 102,30 долларга етди. Шу билан бирга, West Texas Intermediate нефти 8,7 фоизга ўсиб, 104,94 долларга чиқди.

Бозор иштирокчилари музокараларнинг муваффақиятсиз якунланишини глобал энергетика инқирозининг янада чуқурлашиши билан боғламоқда.

Ҳўрмуз бўғози — Hormuz Strait орқали жаҳон нефт таъминотининг қарийб бешдан бир қисми ўтади. Шу сабабли бу ҳудуддаги ҳар қандай кескинлик жаҳон бозорига тўғридан-тўғри таъсир кўрсатади.

8-апрел куни АҚШ ва Эрон ўртасида икки ҳафталик шартли сулҳ, жумладан, Ҳўрмуз бўғозининг қайта очилиши бўйича келишувга эришилгач, Брент маркали нефтнинг бир баррел нархи қарийб 90 долларгача пасайди.

Ўшандан бери сулҳнинг узоқ давом этишига шубҳалар ортиб, Исроилнинг Ливанга зарбалари давом этаётгани боис нархлар беқарорлигича қолмоқда.

Иқтисодчилар фикри

Сингапурдаги Nanyang Technological University иқтисодчиси Чуа Ёу Хвига кўра, нефт нархлари юқори даражада сақланиб қолиши мумкин.

«Нефт нархлари, эҳтимол, юқори даражада сақланиб қолади, чунки эндиликда кутилмалар блокаданинг тўлиқ амалга оширилиши, кемачиликдаги узилишларнинг кенгайиши ва дипломатиянинг қайта тикланишига боғлиқ бўлиб турибди», — деди у.

Молия бозорлари ҳам ушбу вазиятга салбий реакция билдирди. Япониянинг Nikkei 225 индекси 1 фоизга тушган бўлса, Жанубий Кореянинг Kospi индекси 0,8 фоизга пасайди.