Трамп Си Жинпинг билан учрашувни «10 балллик шкалада 12» деб баҳолади
Жанубий Кореянинг Пусан шаҳрида бўлиб ўтган АҚШ ва Хитой етакчилари учрашуви икки давлат муносабатларида янги босқични бошлади. Доналд Трамп учрашувни “аъло даражада” деб атади ва Хитой товарларига тарифлар 57 фоиздан 47 фоизгача пасайтирилишини маълум қилди.
АҚШ президенти Доналд Трамп ва Хитой раҳбари Си Жинпинг Жанубий Кореянинг Пусан шаҳрида икки соатга яқин давом этган тарихий учрашув ўтказди. Бу Трампнинг иккинчи президентлик муддати бошланганидан бери икки давлат етакчилари ўртасидаги илк музокара бўлди.
Учрашув якунларидан кейин журналистлар билан суҳбатда Доналд Трамп музокараларни «ажойиб» деб баҳолади.
«Бу ажойиб учрашув бўлди. У буюк етакчи. Агар баҳолаш шкаласи 10 бўлса, мен 12 қўйган бўлардим», — деди Трамп.
АҚШ президентининг таъкидлашича, Америка Хитой товарларига жорий этилган тарифларни дарҳол пасайтиради. Янги келишув доирасида Пекин АҚШга фентанил компонентлари экспортини тўхтатиш, ноқонуний наркотик савдосига қарши курашни кучайтириш ва Америка сояси ҳамда нодир ерости металллари импортини тиклаш мажбуриятини олган.
Бундан ташқари, Трамп Хитой нодир ер металлари ва муҳим минераллар етказиб беришни давом эттиришга рози бўлганини таъкидлади.
Reuters агентлигининг ёзишича, Трампнинг баёнотига кўра, тарифлар 57 фоиздан 47 фоизгача туширилади. Бу Вашингтон ва Пекин ўртасидаги тўқнашувли савдо муносабатларини юмшатишга қаратилган илк қадам сифатида баҳоланмоқда.
Бундан ташқари, Трамп икки давлат Украинадаги можарони ҳал қилиш борасида «биргаликда иш олиб бориши»ни айтди. Унинг сўзларига кўра, АҚШ ва Хитой бу масалада «ҳамжиҳат позиция»ни излаб топиш ниятида.
Си Жинпинг ҳозирча учрашув натижалари ҳақида расмий баёнот бермаган. У Пусандан сўнг APEC саммитида иштирок этиш учун ўз фаолиятини давом эттирмоқда.
