Трамп Таиланд ва Камбоджа ўртасидаги жанговар тўқнашувларни тўхтатишга аралашмоқчи
Таиланд–Камбоджа чегарасида кескинлик кучайган бир пайтда, АҚШ президенти Доналд Трамп вазиятни тинчитиш мақсадида икки давлат раҳбарларига телефон орқали мурожаат қилишини билдирди.
Яқин кунларда Таиланд ва Камбоджа чегарасида қайта бошланган жанговар тўқнашувлар минтақада хавотирни кучайтирди. Reuters хабар беришича, икки мамлакат бир-бирини тинч аҳоли яшайдиган ҳудудларни ўққа тутишда айбламоқда. Жанжал дүшанба куни яна авж олди, бир неча ойдан бери давом этаётган кескинлик эса дипломатик йўл билан ҳал қилинмаяпти.
АҚШ президенти Доналд Трамп шундай шароитда яна аралашув эҳтимолини билдириб, июл ойида унинг воситачилигида тузилган оташкесим режимини сақлаб қолиш учун телефон орқали мулоқот қилишини айтди. Трамп ўз чиқишида Покистон–Ҳиндистон ва Исроил–Эрон ўртасидаги можароларни юмшатишда ҳам рол ўйнаганини таъкидлаб, «Таиланд ва Камбоджа урушини тўхтатиш учун ҳам мен қўнғироқ қилишим керак бўлади», деди.
Бироқ Таиланд ҳукумати бундай ташаббусга ҳозирча очиқ эмаслигини билдирди. Расмий Сирипонг Ангкасакулкиятнинг таъкидлашича, музокаралар учинчи томон орқали эмас, Камбоджанинг ўзи ташаббус кўрсатиб, таҳдидларни тўхтатиши ва расмий равишда мулоқот сўраши билан бошланиши керак. Камбоджа томони эса жавобан фақат ўзини ҳимоя қилганини, тинчликка интилиш позицияси ўзгармаганини таъкидламоқда.
Маълумот учун, июл ойидаги беш кунлик қаттиқ тўқнашувларда камида 48 киши ҳалок бўлганди. Ўша вақтда Трамп савдо музокараларидан восита сифатида фойдаланиб, заиф оташкесим тузилишини таъминлаганди.
Ҳозир эса ҳар икки давлат расмийлари вазият учинчи томон воситачилиги учун ноқулайлигини, аммо Камбоджа томони исталган пайт музокарага тайёр эканини билдирмоқда.
