Трамп учинчи муддатга номзод бўлолмаслигидан афсусда

АҚШ президенти Доналд Трамп учинчи президентлик муддатига номзод бўлиш имконияти йўқлигидан афсус билдираётганини маълум қилди. Бу ҳақда у президент самолёти бортида Япониядан Жанубий Кореяга йўл олган пайтда журналистлар саволларига жавоб бера туриб айтди.

Трампга АҚШ Конгрессининг вакиллар палатаси спикери Майк Жонсоннинг сўзлари ҳақида савол берилди. Жонсон аввалроқ Трампнинг учинчи муддатга сайланиш имконини Конституция рад этишини айтган эди.

«Менга учинчи марта номзодимни қўйишга рухсат йўқ. Нима бўлишини кўрамиз. Конституцияни ўқисангиз, мен учун бу аниқ — номзодимни илгари сура олмайман. Бу жуда таассуфли», — деди Трамп.

АҚШ констититуциясининг 22-моддасига кўра, АҚШ президенти лавозимига фақат икки марта сайланиш мумкин. Жонсоннинг таъкидлашича, Трамп бу чекловни яхши билади.

Шу билан бирга, Трамп яқинда берган интервьюсида учинчи марта президент бўлиш ҳақида ўйламаганини, аммо АҚШда ўзини ҳали ҳам катта қўлловга эга шахс сифатида кўраётганини таъкидлаган.

Бугунроқ Доналд Трамп Жанубий Кореяга ташриф буюрди. Жанубий Корея президенти Ли Жэ Мёнг билан учрашган Трамп аллақачон КХДР ва Жанубий Корея ўртасидаги можарони ҳал қилишга ваъда берган.

«Мен Корея яриморолида расман уруш ҳолатида эканликларингизни биламан, лекин буни ҳал қилиш учун нималар қилиш мумкинлигини кўриб чиқамиз», — деган Трамп.

Трамп Кореяда Осиё-Тинч океани иқтисодий ҳамкорлик ташкилоти (APEC) саммитида иштирок этади ва Хитой раиси Си Жинпинг билан учрашади.