Трамп ва Путиннинг Будапештдаги саммитига тайёргарлик вақтинча тўхтатилганга ўхшайди
Оқ уйдан олинган маълумотга кўра, АҚШ президенти Доналд Трамп Венгрияда ўтказилиши режалаштирилган Путин билан саммитни вақтинча тўхтатган. Сабаби — икки томон ҳам музокараларга ҳали етарлича тайёр эмас.
АҚШ ва Россия президентлари ўртасида Будапештда бўлиб ўтиши кутилган саммитга тайёргарлик жараёни тўхтатилди. Бу ҳақда NBC News мухбири Гаррет Ҳааке Оқ уйдаги юқори мартабали манбасига таяниб, ўзининг Х ижтимоий тармоғидаги саҳифасида хабар берди.
«Трамп ва Путин саммитига оид режалаштириш ишлари ҳозирча “тўхтатилган” ҳолда», — деб ёзди журналист.
Маълумотларга кўра, АҚШ давлат котиби Марко Рубио ва Россия ташқи ишлар вазири Сергей Лавров ўртасидаги сўнгги телефон мулоқоти «самарали» ўтган, бироқ президент Доналд Трамп бу босқичда томонлар музокараларга етарли даражада тайёр эмас, деган хулосага келган.
Эслатиб ўтамиз, 16 октябр куни Трамп ва Путин узоқ телефон суҳбати ўтказган эди. Шу суҳбатдан сўнг Америка раҳбари Будапештда шахсан учрашиш нияти борлигини маълум қилган ва бу орқали «Россия ва Украина ўртасидаги урушни тугатиш имкониятини кўриш» мақсад қилинганини айтган эди.
Ҳозирча Оқ уй ҳам, Кремл ҳам саммитни кейинроқ қайта ташкил этиш ёки янги санани белгилаш бўйича расмий изоҳ бергани йўқ.
