Трамп Венесуэла нефт захираларини АҚШ назорати остига ўтказишини эълон қилди
Оқ уй раҳбари янги келишув Қўшма Штатларнинг нефт захираларини икки баробардан кўпроқ ошириши ва бензин нархларини пасайтириш имконини беришини айтди.
© White HouseАҚШ Венесуэла билан келишув тузди. Унга кўра, мамлакатнинг 65 миллиард баррелдан ортиқ нефт захиралари АҚШ назоратига ўтади. Бу ҳақда Оқ уй раҳбари Доналд Трамп Truth Social тармоғида маълум қилди.
«Америка Қўшма Штатлари ҳозиргина Венесуэла билан жаҳон тарихидаги энг йирик нефть битими бўйича келишувга эришди», — деб ёзди Трамп.
Унинг сўзларига кўра, келишувга давлат котиби Марко Рубио ва Пентагон раҳбари Пит Ҳегсет Венесуэланинг муваққат президенти Делси Родригез билан биргаликда эришган. Жараёнда хусусий бизнес вакиллари ҳам иштирок этган. Трампнинг таъкидлашича, бу келишув америкалик солиқ тўловчилардан маблағ талаб қилмайди.
АҚШ президенти ушбу келишув мамлакатнинг нефт захираларини икки баробардан кўпроқ оширишини, бозордаги нефт таклифини кўпайтиришини ва узоқ муддатда америкаликлар учун бензин нархларини пасайтиришини айтди. Трампнинг сўзларига кўра, келишув Венесуэла иқтисодиётини тиклашга ҳамда Каракас ва Вашингтон ўртасидаги муносабатларни мустаҳкамлашга ёрдам беради.
АҚШ давлат котиби Марко Рубио Х ижтимоий тармоғида ушбу келишувни америкаликлар ва венесуэлаликлар учун «улкан ғалаба» деб атади. Унинг сўзларига кўра, битим АҚШга барқарор нефт захиралари ва арзон нефтдан фойдаланиш имконини беради. Венесуэла эса қарийб 100 миллиард долларлик хусусий инвестицияларни жалб қилади, минглаб юқори маошли иш ўринлари яратилади ва мамлакат иқтисодиётини тиклашга ёрдам беради.
Олдинроқ «Bloomberg» Пентагон Венесуэла нефтига тўғридан-тўғри кириш имкониятини қўлга киритишни муҳокама қилаётганини хабар қилган эди. Музокаралар тахминан 17 та нефт конига, жумладан, Ориноко нефт минтақасидаги ва Маракайбо кўли атрофидаги конларга тегишли бўлган. Кўриб чиқилган вариантлардан бирида нефт конларини 100 йил муддатга ижарага олиш таклиф қилинган.
Вашингтон билан муносабатлар яқинлашаётган бир пайтда, Венесуэла ОПЕКдан чиқиш имкониятини ҳам кўриб чиқмоқда. Бу масала АҚШ томони билан муҳокама қилинган, бироқ ҳозирча якуний қарор қабул қилинмаган. Венесуэла 1960-йилдан бери ОПЕК аъзоси ҳисобланади.
Эслатиб ўтамиз, аввалроқ Трамп ўзини АҚШ тарихидаги энг буюк президент деб атаганди. Экспертлар эса уни энг омадсиз президентлардан бири сифатида баҳоламоқда.
