Трамп Зеленскийга Рождествогача муҳлат берди — Financial Times

АҚШ президенти Доналд Трампнинг вакиллари Украина президенти Володимир Зеленскийга Вашингтон таклиф этган тинчлик режаси бўйича жавоб бериш учун бир неча кунлик муҳлат берган. Бу ҳақда Financial Times газетаси ўз манбаларига таяниб хабар бермоқда.

Музокаралардан хабардор масъул амалдорларнинг нашрга маълум қилишича, Украина раҳбари Европадаги иттифоқчиларига 6 декабр куни бўлиб ўтган телефон суҳбати чоғида АҚШ президентининг вакиллари Стив Уиткофф ва Жаред Кушнер унга босим ўтказиб, таклиф бўйича тезкор қарор қабул қилишни талаб қилганини сўзлаган.

Financial Times суҳбатдошларидан бири Трамп «Рождествогача» (эҳтимол, 25 декабр назарда тутилмоқда) битим тузишга умид қилаётганини билдирди.

Нашрнинг таъкидлашича, АҚШнинг тинчлик режаси Украинадан Америка томонининг ноаниқ хавфсизлик кафолатлари эвазига ҳудудий ён беришга рози бўлишни (Россия бутун Донбассни талаб қилмоқда) талаб қилмоқда. Украина ҳукумати Россияга ҳеч қандай ҳудудларни топшириш вариантини кўриб чиқмаслигини бир неча бор таъкидлаган.

Газета маълумотларига кўра, Зеленский Трампнинг вакилларига Вашингтон таклифига жавоб беришдан олдин бошқа европалик иттифоқчилар билан маслаҳатлашиш учун вақт кераклигини айтган. Киев АҚШ Европасиз тинчлик режаси бўйича қарор қабул қилса, бу Ғарб давлатлари бирлигига путур етказиши мумкинлигидан хавотирда.

Ғарб амалдорларидан бири фикрича, Украина томони қабул ўзи қила олмайдиган ҳудудий талаблар ва рад эта олмайдиган АҚШ талаблари ўртасида қолиб кетган.

Украина президенти Владимир Зеленский АҚШ президентининг махсус вакили Стивен Уиткофф ва Доналд Трампнинг куёви Жаред Кушнер билан узоқ суҳбат ўтказганини маълум қилди.

Шунингдек, Трамп Зеленскийнинг Россиянинг Украина билан урушини тўхтатиш бўйича Америка режасини имзолашга «тайёр эмас»лигини айтди. АҚШ президенти Украина раҳбари Вашингтоннинг тинчлик таклифини «ҳали ўрганиб чиқмагани»дан «бироз кўнгли қолганини» билдирди.

АҚШ вакиллари билан музокаралардан сўнг Зеленский Лондонда Франция, Германия ва Буюк Британия раҳбарлари билан учрашди. Музокаралардан кейин у АҚШнинг тинчлик режаси 28 банддан 20 бандга қисқартирилгани ва ундан очиқчасига «Украинага қарши» таклифлар олиб ташлангани ҳақида аниқлик киритди. Шунингдек, Зеленский Европа ва Украина тинчлик режасининг ўз версиясини тайёрлаётганини маълум қилди.

Илгари АҚШ тинчлик режаси туфайли Украинага босим ўтказаётгани ҳақида Axios нашри хабар берган эди. Бундан ташқари, Украина расмий шахслари журналистларга Вашингтон Москвадан кўра Киевга кўпроқ тазйиқ ўтказаётганини айтишган.