Трампнинг куёви ва Оқ уйнинг махсус вакили Путин билан учрашмоқчи – ОАВ
АҚШ вакиллари Украина бўйича янги тинчлик таклифларини муҳокама қилишни режалаштираётгани айтилмоқда.
«Bloomberg» манбаларига кўра, Оқ уйнинг махсус вакили Стив Уиткофф ва АҚШ президенти Доналд Трампнинг куёви бўлган Жаред Кушнер Москвага сафар қилиб, Россия президенти Владимир Путин билан учрашишни режалаштирмоқда, дея хабар қилди «Reuters».
Таъкидланишича, кутилаётган учрашув жорий ой давомида ўтказилиши мумкин. Бироқ режалар ҳали якуний тасдиқланмаган ва Эрондаги беқарорлик учрашув санаси ўзгариши эҳтимоли ҳам бор. Шу билан бирга, Оқ уй вакили «Bloomberg»га бундай учрашув ҳозирча расман режалаштирилмаганини маълум қилган.
Хабарда қайд этилишича, АҚШ делегацияси Москвада Россия раҳбариятига Украина бўйича тинчлик келишувининг сўнгги лойиҳасини тақдим этишни кўзламоқда. Музокаралар давомида эҳтимолий келишув ижросини таъминлаш учун АҚШ ва Европа томонидан хавфсизлик кафолатлари бериш масалалари муҳокама қилиниши кутилмоқда.
Шунингдек, Украинада урушдан кейинги тикланиш жараёнлари ҳам музокара кун тартибидан ўрин олиши мумкин. Бу йўналишда халқаро молиявий кўмак, инфратузилмани қайта қуриш ва инвестицияларни жалб этиш масалалари муҳокама қилиниши мумкин.
Бу хабар АҚШ президенти Доналд Трампнинг январ бошида берган баёнотларидан сўнг тарқалди. У Россия ва Украина ўртасидаги уруш давом этаётганидан норозилигини билдириб, аввалроқ бу можарони ҳал этиш осон бўлади, деб ўйлаганини таъкидлаганди.
Эслатиб ўтамиз, аввалроқ АҚШ Соҳил хавфсизлик хизмати Тринидад яқинлигидаги Кариб денгизида Россиянинг яна бир танкерини қўлга олгани ҳақида хабар қилгандик.
