Трампнинг «олтин смартфони» ниҳоят сотувга чиқмоқда
Америка Қўшма Штатлари президенти Доналд Трампнинг смартфонлари қарийб бир йиллик кечикишдан сўнг харидорларга жўнатилишни бошлайди. Бу ҳақда «Trump Mobile» компанияси расмий баёнотига таяниб, «CNN» хабар берди.
Маълум қилинишича, шу ҳафтадан — компания 100 доллар миқдорида депозитларни қабул қилишни бошлаганидан бир йил ўтиб тилла билан қопланган «Trump Phone» қурилмалари эгаларига жўнатилади.
Нархи 499 доллар бўлган ва расман «Trump Mobile T1» деб номланган ушбу смартфон ташқи кўринишидан «Walmart» дўконларида 200 доллардан арзонроқ сотиладиган Хитой телефонларини эслатади. «Trump Organization» дастлаб ваъда қилган хусусиятлардан фарқли ўлароқ, қурилма кичикроқ экран ва камроқ хотир ҳажмига эга бўлган. Бироқ Трамп бренди ва олтин ранги ўзгаришсиз қолган.
«Fortune» нашрининг қайд этишича, аввалроқ компания қурилма ишлаб чиқарилишини кафолатламаслигини билдирган эди. Шунга қарамай, «Trump Mobile» ижтимоий тармоқларда телефонлар жўнатилиши ҳақида расмий хабар қолдирди. Изоҳ қолдириш имконияти эса ўчириб қўйилган.
Кечикиш сабаблари
«Т1 телефонига олдиндан буюртма берганлар янгилик хатини оладилар. Телефонларни жўнатиш шу ҳафтадан бошланади!!!» — деб ёзилган компания хабарида.
Дастлаб ўтган йилнинг август ойида етказиб берилиши керак бўлган смартфонларнинг кечикишига «мураккаб технологик маҳсулотни бозорга чиқариш жараёни» сабаб қилиб кўрсатилди.
«Технологик бизнес баъзилар ўйлаганидан кўра мураккаброқ, чунки барча қисмлар сифат назоратидан ўтиши керак. Талаб жуда юқори бўлгани сабабли буюртмалар имкон қадар тезроқ бажарилмоқда ва биз яқин бир неча ҳафта ичида жараён якунланишини кутмоқдамиз», — деган компания бош ижрочи директори Пэт О’Брайен «CNN»га берган баёнотида.
Таҳлилчи Макс Вайнбахнинг сўзларига кўра, «Android» қурилмалари учун дастурий таъминот ва ишлаб чиқарувчилар билан шартномаларни якунлаш одатда 18 ой вақт олади.
«Android қурилмасини бозорга чиқариш учун кўплаб тўсиқлардан ўтиш талаб этилади», — деб ёзади у.
Made in China?
Қайд этилишича, телефон дастлаб «АҚШда ишлаб чиқарилган» деб тақдим этилган эди. Бироқ кейинчалик бу жумла «Америка қадриятларини инобатга олган ҳолда лойиҳалаштирилган» деб ўзгартирилган. Соҳа экспертлари смартфоннинг техник тавсифлари Хитой ишлаб чиқарувчисининг маҳсулотига ўхшашлигини таъкидлаб, унинг Америкада ишлаб чиқарилганига шубҳа билдиришган.
Смартфоннинг чиқарилиши Трамп президентлик даврида ўз номидан фойда кўриш мақсадида фойдалангани ҳақидаги баҳсларга сабаб бўлди. Қурилма «Trump Organization» томонидан яратилган бўлиб, унга президент Трампнинг катта ўғиллари Эрик ва Доналд Кичик раҳбарлик қилади.
Демократ сенатор Элизабет Уоррен ушбу кечикишни «Трампнинг навбатдаги фирибгарлиги» деб атади. Маълумот ўрнида, телефоннинг алоқа ва интернет режаси нархи 47,45 долларни ташкил этади, бу Доналд Трампнинг АҚШнинг 45 ва 47-президенти бўлганига ишорадир.
