«Трамппараст» Борис Жонсон АҚШнинг «Тинчлик режаси»ни бир пулга қимматга чиқарди

Буюк Британиянинг собиқ бош вазири Борис Жонсон АҚШ президенти Доналд Трамп таклиф қилган Украинадаги тинчлик режасини кескин танқид қилди. Унинг фикрича, ҳужжат «Америка раҳбариятининг лаёқатсизлигидан» далолат беради. Бу ҳақда у Daily Mail нашрида чоп этилган мақоласида маълум қилган.

Жонсонга кўра, Россия 2022 йилдан бери давом этаётган урушда 1 миллиондан ортиқ ҳарбийсини йўқотган, аммо жанг майдонида катта ҳудудлар эгаллай олмаган. Шу вазиятда АҚШ Украинага «асли Кремлда ёзилгандай туюладиган» тинчлик режасини таклиф қилмоқда, дея таъкидлайди сиёсатчи.

«Бу кулгили. Режа Украина Қуролли Кучларини ҳарбий жиҳатдан фалаж қилишни, Киевнинг НАТОга аъзолик ҳаракатларига Россия вето ҳуқуқини, ҳатто хорижий қўшинларнинг Украинага киришига Москва назоратини назарда тутади. Украина нафақат Қрим ва Донбассни қайтаришга бўлган уринишларидан воз кечиши, балки айни дамда Россия назорати остида бўлмаган ҳудудларни ҳам бериши керак», — деб ёзади у.

Унинг таъкидлашича, АҚШ ҳужжати 250 мингга яқин украин тинч аҳолиси истиқомат қилаётган ҳудудларни ҳам Россияга топширишни таклиф қилмоқда. Жонсон ушбу режани «Украинага хиёнат» деб атади ва бу қарорга ишониш мумкин эмаслигини айтди.

Эътиборлиси, у аввал Трампни қўллаб-қувватлаган сиёсатчилардан бири бўлган, бироқ бу гал у Трамп позициясини кескин танқид қилди.