Туркиянинг Айдинида отилган ўзбек аёли: айбдорга умрбод қамоқ талаб қилинмоқда

Туркиянинг Айдин вилояти Кўшк туманида 35 ёшли ўзбекистонлик Муаттар Алиева кўнгилочар масканда бошидан ўқ еган ҳолда топилиб, шифохонада вафот этган эди. Тергов якунида корхона эгаси Рашит Ясанга нисбатан «аёлга қарши қасддан одам ўлдириш» моддаси билан оғирлаштирилган умрбод қамоқ жазоси талаб қилинган айблов хулосаси тайёрланди, деб хабар бермоқда «Haberler.com».

Ҳодиса ўтган йил 5 июл куни соат 03:30 атрофида Явузкўй маҳалласидаги газинода содир бўлган эди. Оғир аҳволдаги Алиева Кўшк давлат шифохонасига олиб борилган, аммо шифокорлар уни қутқара олмаган. Тергов давомида Рашит Ясан қўлга олинган, шунингдек, Эмраҳ К., Акиф Д., К.К. ва А.Ч. ҳам ушланган.

Ясан «аёлга қарши қасддан одам ўлдириш»да айбланиб қамоққа олинган. Акиф Д. камера ёзувларини ўчиргани, Эмраҳ К. эса жиноятда ишлатилган қуролни йўқ қилгани гумони билан «далилларни йўқ қилиш» моддаси бўйича қамалган. Кейинчалик айрим гумондорлар адвокатлар шикоятидан сўнг озод этилган. Тергов жараёнида Иброҳим Й. ҳам далилларни йўқ қилгани аниқланган.

Айблов ва ҳимоя

Тергов доирасида 40 нафар шахс сўроқ қилинган. Айблов хулосасида Ясанга оғирлаштирилган умрбод қамоқ жазоси, қолган уч гумондорга эса 5 йилгача қамоқ жазоси сўралган.

Ясан кўрсатмасида Алиева билан муносабатлар тугаганини айтгани, аёл бунга рози бўлмай, ўз жонига қасд қилишини билдирганини таъкидлаган. Унинг сўзларига кўра, Алиева аввал ҳавога ўқ узган, сўнг ўзини отган. Ҳодисанинг ягона гувоҳи ҳам шунга ўхшаш кўрсатма берган.

Бироқ айблов хулосасида Ясаннинг ўзини ҳимоя қилиш мақсадида бундай баёнот бергани қайд этилган. Ҳодисадан кейин у шифохонага олиб кетилаётганда «Қурол қаерда?» ва «Ёзувлар нима бўлди?» дея сўрагани айблов хулосасига киритилган.

Тергов хулосаси

Ҳужжатда ҳодиса содир бўлган хонада кузатув камераси бўлмагани кўрсатилган. Акиф Д. эса ҳодиса пайтига оид ёзувларни ўчирмаганини айтган. Эмраҳ К. яширгани гумон қилинган қуролни кейинчалик прокуратурага топширган.

Айблов хулосаси ишни судга юбориш учун расмийлаштирилган. Суд жараёнида барча далиллар ва гувоҳликлар қайта кўриб чиқилиши кутилмоқда.

Аввалроқ Истанбулда ўзбекистонлик икки аёл ўлдирилиб, жасадлари бурдалангани ҳақида хабар берган эдик.