Украинада асир тушган шимолий кореяликлар Сеулдан паноҳ сўради
Россия сафида Украинага қарши жанг қилган икки шимолий кореялик аскар асирга тушгач, уларни Жанубий Кореяга топширишни илтимос қилган. Улар ўз ватанига қайтишдан қўрқмоқда.
Германиянинг Deutsche Welle нашри ёзишича, Украинада асирга тушган икки шимолий кореялик жангчи украин ҳарбийларидан уларни Сеул ҳукуматига топширишни сўраган. Улар бу илтимосни ҳужжатли фильм учун берилаётган суҳбат пайтида билдирган. Суҳбат Жанубий Кореянинг «Gyeore-eol Nation United» инсон ҳуқуқлари ташкилоти иштирокида ўтказилган.
Маълумотларга кўра, асирлардан бири шу йилнинг феврал ойида Жанубий Корея Миллий Ассамблеяси вакили Ю Ён-вён орқали ҳам шундай илтимос билан чиққан. Депутат ўз саҳифасида аскар билан суҳбат лавҳаларини эълон қилган эди.
Жанубий Корея разведка хизмати маълум қилишича, Шимолий Корея ҳарбийларига асирга тушмаслик учун ўз жонларига қасд қилиш буйруғи берилади. Жароҳат олганлар эса граната билан ўзини портлатишга мажбур қилинади. Сентябрь ойидаги маълумотларга кўра, Украинадаги жангларда 2 мингга яқин шимолий кореялик аскар ҳалок бўлган.
Украина ва Ғарб разведка хизматлари маълумотларига кўра, 2024 йил давомида Пхеньян Россияга 10 мингга яқин аскар юборган. Шунингдек, у Россияни қурол-яроғ ва ҳарбий техника билан таъминлаб келмоқда. Украина ҳарбий разведкаси раҳбари Кирилл Будановнинг айтишича, рус армияси ишлатадиган ўқ-дориларнинг тахминан 40 фоизи Шимолий Кореядан келади. Эвазига эса Шимолий Корея Россиядан сунъий йўлдошлар учириш бўйича техник ёрдам ва маслаҳатлар олмоқда, деб ҳисоблайди Жанубий Корея ва Ғарб разведкалари.
Бу маълумотлар Пхеньяннинг Москва билан ҳарбий ҳамкорлиги тобора чуқурлашиб бораётганини кўрсатади. Экспертлар фикрича, бу ҳаракатлар Шимолий Кореяни халқаро изоляцияни янада кучайтиради.
