Украиналикларнинг АҚШ ва НАТОга ишончи кескин пасайди

Украина аҳолиси орасида АҚШ ва НАТОга бўлган ишонч даражаси сўнгги бир йил ичида сезиларли даражада пасайди. Бу ҳақда Киев халқаро социология институти (КХСИ) ўтказган навбатдаги ижтимоий сўров натижаларида маълум қилинди.

Сўров маълумотларига кўра, 2025 йил декабрида украиналикларнинг атиги 21 фоизи АҚШга ишонч билдирган. Бу 2024 йил декабридаги кўрсаткичдан деярли икки баробар кам — ўшанда ишонч даражаси 41 фоизни ташкил этган эди. Шу билан бирга, АҚШга ортиқ ишонмайдиганлар улуши ҳам кескин ошган: агар 2024 йилда бу кўрсаткич 24 фоиз бўлган бўлса, 2025 йилда 48 фоизга етган.

НАТОга нисбатан муносабат ҳам салбий томонга ўзгарган. 2025 йилда алянсга ишонч билдирганлар 34 фоизни ташкил қилди, бу эса ўтган йилдаги 43 фоиздан анча паст. НАТОга ишонмаслигини билдирганлар улуши эса 25 фоиздан 41 фоизгача ошган.

Шу билан бирга, Европа Иттифоқига нисбатан ишонч даражаси деярли ўзгармаган. Сўров натижасига кўра, украиналикларнинг 49 фоизи ЕИга ишонади, 23 фоизи эса ишонмаслигини билдирган.

Айни пайтда Украина президенти Володимир Зеленскийга бўлган ишонч даражаси бироз ошган. Декабр ойида унга ишонч билдирганлар 61 фоизни ташкил этган, октябрда эса бу кўрсаткич 60 фоиз эди. Ишончсизлик даражаси эса 35 фоиздан 32 фоизга тушган.

КХСИ ижрочи директори Антон Грушецкийнинг таъкидлашича, коррупция билан боғлиқ можаролар фонида президентга ишонч пасайиши мумкин эди. Бироқ Зеленский маъмурияти раҳбари Андрей Ермакнинг ишдан олиниши ҳамда АҚШ томонидан босим кучайиши ишончни қайта тиклашга хизмат қилган.

Сўров иштирокчиларининг аксарияти — 57 фоизи президент сайловлари фақат уруш тўлиқ якунланганидан сўнг ўтказилиши керак, деб ҳисоблайди. Яна 25 фоиз респондент эса ўт очиш тўхтатилиб, хавфсизлик кафолатлари берилган тақдирда сайловлар ўтказилишини қўллаб-қувватлаган.