Уруш «микрочиплар ва лойли тўқнашув»га айланди — Sky News

Украинадаги уруш томонларнинг бири иккинчисини ҳолдан тойдирувчи кескин синовга айланди. Уруш стратегик режалар эмас, балки фронт чизиғидаги кундалик омон қолиш кураши сифатида намоён бўлмоқда.

Британиянинг «Sky News» нашри таъкидлашича, бу можаро XXI аср Биринчи жаҳон урушиининг лойқаланган хандақлари билан қоришган манзарани эслатади. Асосий зарба воситаси сифатида дронлар майдонга чиққан, ерда эса лой ва музлаган йўллар ҳарбийларни синовдан ўтказмоқда.

Фронтдаги кундалик хавф

Нашр Донбассдаги мудофаа чизиғида жойлашган 117-бригада бўлинмалари билан суҳбатлашган. Славянск логистика марказини ҳимоя қилаётган жангчиларнинг айтишича, у ерни муҳофаза қилаётганлар учун хавф доимий таҳдиддир.

«Бу кунига икки-уч марта такрорланади: музлаган йўллар, кўринмас дронлар, учар қурилмалар ва руслар. Хавф бундан ортиқ бўлиши мумкин эмас. Таҳдидлар бир неча сония ичида ҳар томондан ёпирилиб келади», — дейди аскарлардан бири.

117-бригада қўмондони, полковник Дмитрий Ярошенконинг таъкидлашича, уруш характери тубдан ўзгарган. Илгари қуруқликдаги жанг устувор бўлган бўлса, ҳозир осмонда устунлик ҳал қилувчи омилга айланган. Унинг сўзларига кўра, дронлар ҳатто вертолётларга қарши қўлланмоқда.

Ҳарбийнинг сўзларига кўра, логистика энг заиф нуқтага айланган. Учувчисиз қурилмалар транспорт ҳаракатини доимий назоратда ушлаб турибди.

«Агар душман бирор транспорт воситасини пайқаб қолса, у катта эҳтимол билан тезда йўқ қилинади», — деди у.

Берк кўча

Австралия армиясининг истеъфодаги генерали, ҳарбий шарҳловчи Мик Райаннинг фикрича, Украинадаги уруш классик берк кўчага кириб қолган ва ҳеч бир томон ҳал қилувчи ғалабага эриша олмаяпти. Можарони якунлаш учун ҳарбий доктрина ва технологияларда кескин бурилиш ясаш ёки томонлардан бирининг сиёсий инқирози юз бериши керак.

Шу билан бирга, Украина Қуролли Кучлари бош қўмондони Александр Сирский Россия-Украина уруши берк кўчага кириб қолгани ҳақидаги фикрга қўшилмаган. У нафақат Россия, балки Украина ҳам ҳужум операцияларини амалга ошираётганини, натижада ҳудудлар қўлдан-қўлга ўтаётганини эслатиб ўтган.