Uzbekistan Airways ички рейслар учун янги қоидалар жорий этди
2026 йилдан бошлаб ички парвозларда биринчи рейсга кечиккан йўловчиларнинг қайтиш чипталари автоматик бекор қилинмайди.
Uzbekistan Airways Ўзбекистон ҳудуди бўйлаб амалга ошириладиган ички рейсларда авиачипталардан фойдаланиш бўйича янги қоидаларни жорий этди.
Миллий авиакомпания матбуот хизматига кўра, ўзгаришлар йўловчилар томонидан чиптада белгиланган йўналиш кетма-кетлиги бузилган ҳолатларга тааллуқли бўлиб, 2026 йил январидан амал қила бошлайди.
Амалдаги қоидаларга мувофиқ, йўловчини ташиш шартномаси авиачиптада кўрсатилган йўналиш кетма-кетлигида, яъни биринчи жўнаш пунктидан бошлаб бажарилиши лозим. Бироқ амалиётда турли сабабларга кўра айрим йўловчилар биринчи рейсга улгурмай қолиши ёки манзилга бошқа транспорт орқали етиб бориши ҳолатлари кузатилган.
Илгари бундай вазиятда «бориш–келиш» чиптасининг кейинги қисми ҳам ҳақиқий эмас деб топилар эди.
Янги тартибга кўра эса, агар йўловчи парвознинг биринчи ёки ундан олдинги қисмидан фойдаланмаган бўлса, авиакомпания кейинги барча йўналиш қисмлари учун бронни автоматик равишда бекор қилмайди.
Йўловчи чиптада кўрсатилган қолган йўналиш бўйича парвозни давом эттириш ҳуқуқига эга бўлади.
Бу қарор ички рейслардан фойдаланувчи минглаб йўловчилар учун қўшимча қулайлик яратади.
Шу билан бирга, авиакомпания молиявий масалалар бўйича аниқ чекловларни сақлаб қолмоқда. Тариф туридан қатъи назар, фойдаланилмаган парвоз қисмларининг қиймати қайтарилмайди. Фақатгина фойдаланилмаган рейслар учун тўланган айрим аэропорт йиғимларини қайтариб олиш имконияти мавжуд.
Бундан ташқари, фойдаланилмаган парвоз қисмлари бўлган чипталар қайта расмийлаштириш учун қабул қилинмайди.
Халқаро рейслар учун эса аввалги стандарт қоидалар амал қилади. Агар йўловчи йўналишнинг биринчи ёки ундан олдинги қисмига чиқмаса, кейинги барча парвозлар учун брон ҳеч қандай огоҳлантиришсиз автоматик равишда бекор қилинади.
Бундай ҳолатда йўловчи чиптани қайта расмийлаштириши ёки тўловни қайтариши мумкин.
Маълумот ўрнида айтиш жоизки, 2025 йил август ойида Рақобат қўмитаси авиакомпанияга ички рейсларда ташиш қоидаларини ўзгартириш бўйича кўрсатма берган эди. Илгари амал қилган тартиб йўловчилар ўртасида кўплаб норозиликларга сабаб бўлган.
