Владимир Путин: «Уруш русларнинг генларида бор»
Владимир Путин Украинага қарши урушда иштирок этган ҳарбийлар билан учрашувда рус халқи «урушга генетик мойил» эканини айтди. Унинг сўзларига кўра, «бу хислат халқ қонида бор».
Россия президенти Владимир Путин Мандрика номидаги ҳарбий ҳоспиталга ташрифи чоғида Украинага қарши урушда қатнашган ҳарбийлар билан суҳбатлашди. Учрашув давомида у руслар «урушга генетик жиҳатдан мойил» эканини таъкидлади.
Путин бу фикрни «СВО қаҳрамони» деб аталган бир ҳарбий билан суҳбатида билдирди. Ҳарбий ўз бобоси Иккинчи жаҳон урушида қатнашганини айтганида, Путин унинг бош бармоғини ушлаб, «Қара, сен ҳам бобонгдек урушяпсан, бу бизнинг генларимизда бор», — деди. Путин «бу хислат бизнинг қонимизда, у йўқолмайди», — деб қўшимча қилди.
Учрашувда 127-разведка бригадаси хизматчилари қатнашди. «Агентство» маълумотларига кўра, улар орасида жиноий ўтмиши бўлган шахслар ҳам бор. Масалан, Рустем Ибраимов бир неча марта ўғирлик ва ўлдириш билан таҳдид қилганлик учун судланган.
Яна бир иштирокчи — Қримлик 21 ёшли Владислав Бобко 2023 йилда ўғирликда гумон қилинган ва ижтимоий тармоқларда ўзини «Vlad Bandit» номи билан танитган.
Маълумот учун, Россия сўнгги 34 йил ичида камида беш йирик урушда иштирок этган: Биринчи чечен уруши (1994–1996), Иккинчи чечен уруши (1999–2009), Гуржистон билан уруш (2008), Суриядаги ҳарбий кампания (2015 йилдан буён) ва Украинадаги уруш (2014 йилдан, 2022 йилдан кенг кўламли ҳужум шаклида).
