«Хитой–Қирғизистон–Ўзбекистон» темирйўли қурилишини молиялаштириш бўйича битим имзоланди
Ушбу лойиҳа 4,7 млрд долларга баҳоланиб, Хитой кредитлари ва уч давлат қўшма ҳиссаси ҳисобидан амалга оширилади.
Бишкек шаҳрида 16 декабр куни «Хитой–Қирғизистон–Ўзбекистон» темирйўлини қуриш лойиҳасини молиялаштириш бўйича муҳим кредит битими имзоланди. Бу ҳақда Қирғизистон Вазирлар Маҳкамаси маълум қилди.
Қайд этилишича, мазкур битим «Хитой — Қирғизистон — Ўзбекистон темирйўл компанияси» МЧЖ ҳамда Хитой давлат тараққиёт банки ва Хитой Эксимбанки иштирокидаги Хитой банклари синдикати ўртасида тузилди. Ушбу келишув минтақавий транспорт инфратузилмасини ривожлантиришда стратегик аҳамиятга эга деб баҳоланмоқда.
Таъкидланишича, лойиҳанинг умумий қиймати 4,7 миллиард долларга тенг. Шундан қарийб 2,3 миллиард доллари қўшма лойиҳа компаниясига 35 йил муддатга кредит сифатида ажратилади. Кредит маблағларини қайтариш бевосита темирйўл лойиҳасини амалга оширувчи компания зиммасига юкланади.
Қолган 2,3 миллиард доллар эса қўшма лойиҳа компаниясининг устав капиталига ҳисса сифатида киритилади. Устав капиталида Хитой томонининг улуши 51 фоизни, Қирғизистон ва Ўзбекистоннинг улуши эса 24,5 фоиздан ташкил этади. Бу тақсимот лойиҳада Хитойнинг етакчи инвестор сифатида иштирокини кўрсатади.
Имзолаш маросимида Қирғизистон Вазирлар Маҳкамаси раисининг ўринбосари Бакит Торобаев лойиҳани тўлиқ молиялаштириш 2025 йил 20 декабрга қадар якунланиши шарт эканини таъкидлаб, мазкур талаб муддатидан олдин бажарилганини маълум қилди.
«Хитой–Қирғизистон–Ўзбекистон» темирйўли техник жиҳатдан минтақадаги энг мураккаб инфратузилма лойиҳаларидан бири ҳисобланади. Қурилиш доирасида 120 километр умумий узунликка эга 50 та кўприк ва 29 та туннель барпо этиш режалаштирилган бўлиб, бу темирйўл трассасининг қарийб 40 фоизини ташкил этади.
