Хитойда олтин бозоридаги ҳаволаш ва чакана бозорга кескин чеклов
Хитой шаҳар идоралари «ноқонуний олтин савдоси»га қарши қатъий чоралар жорий этди. Бозордаги ажиотаж ва спекуляция қай даражага етган?
13 феврал куни Хитойнинг бир қатор шаҳар идоралари «ноқонуний олтин савдоси»ни тўхтатиш талаби билан қўшма баёнот эълон қилди. Унда чакана инвесторларга елка билан савдо таклиф қилувчи иловалар, онлайн-трансляция орқали агрессив реклама ва компанияларнинг ўзини Шангҳай олтин биржаси аъзоси сифатида кўрсатиши тақиқланди. Бу ҳақда «Bloomberg» хабар берди.
Расмийлар, шунингдек, айрим платформалар қуймаларни соф олтин сифатида сотиш ёки қимматбаҳо металларнинг номи билан чалғитиш ҳолатларига чек қўйилишини билдирди. Рекламада «олтин нархи учади» ёки «олтиндан бойиб кет» каби чақириқлар ҳам ман этилди.
Чоралар бозордаги юқори талаб ва спекулятив фаоллик фонида жорий этилди. Хитойда хусусий инвесторлардан тортиб йирик фондларгача бўлган харидорлар оқими нархларни тарихий максимумларгача кўтарди.
Талаб ва хавфлар
Ой охирида кескин тушиш кузатилганига қарамай, трейдерлар фикрича, чакана талаб ҳануз юқори. Хусусан, олтин ETFʼларига рекорд миқдорда маблағ киритилган. Мамлакатдаги ягона кумуш фонди атрофида ҳам қизғин қизиқиш шаклланган.
Асосий фаоллик Шэнжэн шаҳридаги Шуйбэй заргарлик ҳудудида жамланган. Илгари балиқчилар қишлоғи бўлган бу ҳудуд бугун Хитой олтин савдосининг марказига айланган.
Чакана ажиотаж айрим ҳолларда тартибсизликларга сабаб бўлди. Шэнжэнда «Jie Wo Rui» онлайн платформаси орқали олтин харид қилган мижозлар маблағларини қайтариб ололмаганидан сўнг норозилик намойишлари ўтказган. Шундан кейин маҳаллий ҳокимият платформа фаолиятини мониторинг қилиш учун махсус ишчи гуруҳ тузди.
Биржа қоидалари ўзгарди
Спекуляциялар кумуш бозорига ҳам таъсир қилди. Таклиф тақчиллиги сабаб Шангҳай фючерс биржасида яқин муддатли контрактлар узоқ муддатлилардан анча қиммат савдоланди. Омбор захиралари эса сўнгги ўн йилликдаги энг паст даражага тушди.
Шу шароитда Шангҳай фючерс биржаси айрим компанияларга махсус ҳэж квотасисиз кумуш фючерсларини жисмоний етказиб беришга олиб чиқишни тақиқлади. Бу чора омборлардан металл чиқиб кетишини чеклашга қаратилган.