ХВЖдан яхшиланган прогноз: жаҳон иқтисодиёти 2026 йилда 3,3 фоизга ўсади

Халқаро валюта жамғармаси (ХВЖ) 2026 йил учун жаҳон иқтисодиёти ўсиши бўйича прогнозини яна яхшилади. Жамғарма таҳлилчиларига кўра, глобал иқтисодиёт савдо зиддиятлари ва тариф босимларига қарамай барқарорлик намоён қилмоқда, сунъий интеллектга йирик сармоялар эса янги самарадорлик манбаига айланяпти, деб хабар беради «Reuters».

ХВЖнинг янгиланган «World Economic Outlook» ҳисоботида жаҳон ялпи ички маҳсулоти 2026 йилда 3,3 фоизга ўсиши прогноз қилинган. Бу октябр ойидаги баҳолашдан 0,2 фоиз пунктга юқори. 2025 йил якунлари бўйича ҳам ўсиш суръати 3,3 фоиз даражасида бўлиши кутилмоқда.

ХВЖ бош иқтисодчиси Пиер-Оливйе Гуринша жаҳон иқтисодиётининг сиёсий зарбаларга чидамлилигини алоҳида таъкидлади:

«Биз глобал ўсиш етарлича барқарор қолганини кўряпмиз. Иқтисодиёт 2025 йилдаги савдо ва тариф шокларини амалда енгиб ўтди ва аввал кутилганидан яхшироқ натижаларни намоён қилмоқда».

Асосий ўсиш омиллари: сунъий интеллект

Прогнознинг яхшиланишида асосий ҳисса АҚШ ҳиссасига тўғри келади. Америка иқтисодиёти 2026 йилда 2,4 фоизга ўсиши кутилмоқда — бу аввалги прогноздан 0,3 фоиз пунктга юқори.

Бу ўсиш, аввало, сунъий интеллект инфратузилмасига йўналтирилган улкан инвестициялар билан боғлиқ: дата-марказлар қурилиши, юқори қувватли чиплар хариди ва энергетика тармоқларини кенгайтириш.

Минтақалар кесимида

Хитой: 2026 йил учун прогноз — 4,5 фоиз. Бу 2025 йилдаги 5,0 фоизлик кўрсаткичдан паст, аммо аввалги баҳолашларга нисбатан яхшироқ. Пекин экспортни Жануби-Шарқий Осиё ва Европа бозорларига қайта йўналтиришга муваффақ бўлди.

Еврозона: 1,3% ўсиш кутилмоқда. Германияда давлат харажатларининг ортиши, Испания ва Ирландия иқтисодиётидаги кучли динамика ижобий таъсир кўрсатмоқда.

Инфляция: Жаҳон миқёсида инфляция 2025 йилдаги 4,1 фоиздан 2026 йилда 3,8 фоизгача пасайиши кутилмоқда. Бу марказий банкларга пул-кредит сиёсатини юмшатиш учун қўшимча имконият яратади.